Gundekî Diyarbekirê bi asta xwe ya xwendinê navdar e

K24 – Diyarbekir

Li Bakûrê Kurdistanê, bi hêsanî mirov nikare bibîne ku li gundan asta perwerdehiyê bilind be. Lê berovajiyê vê yekê, li Gundê Bîrsînê yê girêdayî Diyarbekirê, çanda perwerdehiyê bi pêş ketiye ku heta welatiyek ji vî gundî niha di Saziya Lêkolînên Fezayê ya Amerîkayê NASA'yê de dixebite. Ji Gundê Bîrsînê 73 bijîşk 110 parêzer, 250 mamoste û endazyarên firokeyan derketine.

Ev der Gundê Bîrsînê yê Diyarbekirê ye ku bi taybetmendiya xwe ya di warê perwerdehiyê de gelek navdar e. Li Gundê Bîrsînê ji 7 saliyan heta 70 saliyan welatî girîngiyê didin xwendin û nivîsandinê û ji %80 yê ciwanên vî gundî yan amadekariya zaningehê dikin an jî di zaningehekê de xwendekar in. Xwendekarên gund ji biçûkan heta mezinan di serdema havînê de dema dibistan tên girtin jî ji xwendinê bêpar namînin û li dibistana gund xebatên xwe yên perwerdehiyê didomînin. Muxtarê Gundê Bîrsînê Ergul Tekeş jî li zanîngeha beşa îktîsadê xwendî ye û dide zanîn ku dema di navçeyan de dibistan nebû, gundê wan xwedî dibistan bû.

Muxtarê Gundê Bîrsînê Ergul Tekeş ji K24ê re got: "70 sal berê gundiyên me bi derfetên xwe dibistanek ava kirin ku wê deme li navçeyên derdorê jî hîn dibistan nebû. Ji wê deme pê de bala gundiyan li ser xwendinê çêbû. Ji ber ku mirovên me jîrek in jî asta perdeye li vir gelek pêş ket."

Ciwanên Gundê Bîrsînê dema vedigerin gund, li aliyekî bi kar û barên rojanê yên gund ve mijûl in li aliyekî jî amadekariyên serdema nû ya zaningehê didomînin. Xwendekarên gund amaje dikin ji ber ku mezinên wan girîngî dane perwerdehiyê, ev yek ji wan re jî bûye mînak û xwendin di jiyana wan de ciheke girîng digire.

Gundê Bîrsînê heta niha 73 bijîşk, 150 parêzer, 250 mamoste û gelek endazyarên firokeyan derxistiye û heta Ûmût Yildiz jî ku ji vî gundî ye, niha di Saziya Lêkolînên Fezayê Ya Amerîkayê NASA'yê de dixebite. Gundiyên Bîrsînê bang dikin ku ew dixwazin gundê wan ji gundê derdorê re jî bibe mînak û ji bo perwerdehiyê girîngî bê dayîn.