Pilaneke Iraqî-Tirkî li dijî PKK tê eşkerekirin

K24 - Navenda Nûçeyan

Rojnameya (El-Musteqbel) ya Lubnanî rêketineke pişt perdê, di nav Iraq û Tirkiyê de, li dijî gerîleyên PKK û hatina artêşa Tirkiyê ji bo nav axa Herêma Kurdistanê eşkere dike.

Wê rojnameyê ji ser zimanê jêderekî haydar belav kiriye, ku "Enqera û Bexda derbarê şerê PKK lihev kirine, li gorî wê lihevkirinê, wê Bexda rê bide Tirkiyê ku bi awayekî sînordar derbasî nav axa Iraqê bibe, ji bilî wê yekê jî, wê Bexda zanyariyên hewalgirî derbarê PKK bide Tirkiyê û ezmanê Iraqê li ber firokeyên cengî yên Tirkiyê veke.

Wî jêderî ji rojnameya navhatî re gotiye: "Têketina hêzên Tirkiyê li nav axa Herêma Kurdistanê, nîşana wê yekê ye, ku destpêkirina operasyoneke serbazî mezin li dijî PKK nêzîk bûye. Herwiha nexşe ji bo bicîkirina operasyoneke serbazî li Şingalê tê danîn weke ew operasyona li Efrînê hat kirin".

Ev daxuyanî di demekê de ne, ku ev bûn 2 meh artêşa Tirkiyê û hin ketîbeyên opozisyona Sûryê, li Efrînê dest bi operasyona (Şaxê Zeytûnê) kirine û di roja 18/3/2018an de, karîn wî bajarî dagîr bikin.

N.O