PDK-S: “PYDê girtiyên siyasî winda kirine”
K24 – Navenda Nûçeyan
Partiya Demokrat a Kurdistanê – Sûriye (PDK-S) bang li rêxistinên navdewletî û mafên mirovan dike ku fişarê li Partiya Yekîtiya Demokratîk bike, ji bo çarenivîsa girtiyên siyasî yên li Efrînê girtî bûn diyar bike.
Nivîsgeha Kurdistan ya PDK-Sê di daxuyaniyekê de got: “Ji destpêka desthilatdariya PYDê li Rojavayê Kurdistanê ve, wê partiyê kiryarên teroristî li dijî sivîl û camewerê Encûmena Niştimanî ya Kurd li Sûriyê (ENKS) û PDK-Sê dike, ji wan jî kiryarên kuştin û girtinê, bi taybet li Efrînê ku hejmarek ji xebatkar xistiye zîndanan, wek Ebdilrehman Apo ku çarenivîsa wî ta niha ne diyar e.”
Di daxuyaniya PDK-Sê de hat jî, “Navê zîndana Reş a li Efrînê bûye wek zîndana Ebû Xirêb a li Iraqê, ku ji sala 2013an ve çarenivîsa xebatkarên Kurd wek Idrîs Elo, Ehmed Sîno û Ehmed Sîdo di wê zîndanê de ne diyar in.”
Amaje diyar kir jî; “PYDê gelek keç û ciwanên temen biçûk revandine û ew bi zorê xistine leşkergehan û di pişt re jî ew birine eniyên şer, ku ev leşkerkirina bizorê jî bû sedem ku bi hezaran xortên Kurd li welatên cîran û Ewropa koçber bibin.”
Nivîsgeha Kurdistan ya PDK-Sê bang li rêxistinên navdewletî û mirovî kir, “Fişarê bixe ser PYDê ji bo diyarkirina çarenivîsa girtiyên siyasî, ji wan jî Ebdilrehman Apo û Behzad Dorsin û sizadana her kesê tawan bi mafê mirovan kiriye.”
Endamê Komîta Navendî ya PDK-Sê Ebdilrehman Apo roja 12 Tîrmeha 2017an ve ji aliyê asayişa Efrînê ve hatibû binçavkirin.
Artêşa Tirkiyê û grûpên çekdar ên opozîsyona Sûriyê ji roja 18ê Adarê ve ketin bajarê Efrînê û dagîr kirine, PDK-S û malbatên girtiyên siyasî jî PYDê tometbar dikin ku çarenivîsa girtiyan ne diyar in û eger heye PYDê ew radestî rêjîma Sûriyê kiribin.
S. B