YPJ: Rêjîm naxwaze axa Sûriyê biparêze
K24 – Amûde
Korbenda Paqijkirina Nijadî û Guhertina Demografî li Efrînê bi çalakiyên xwe berdewam dike, tê de serkirdên YPG eşkere dikin, armancên Tirkiyê ne tenê Efrîn e, lê belê gelek bajarên Sûriyê ye. Akademisyenên beşdar jî li ser giringiya vê korbendê tekez dikin ku dê vê pirsê bighîne civaka navdewletî.
Li bajarê Amûdê çalakiyên Korbenda Paqijkirina Nijadî û Guhertina Demografî li Efrînê berdewam dikin, tê de çendîn mijarên bi bandor têne pêşkêş kirin, ji wan mijara leşkerî ye. Serkirdên Yekîneyên Parastina Gel (YPG) bi semînarekê rola bêdengiya hêzên navdewletî di zêdebûna kiryarên guhertina demografî li Efrînê de zelal kirin. Herwiha bal kişandin ser wê yekê, Turkiyê di şerê xwe li ser Efrînê de çekên qedexekirî bikar anîn û pêwîst e ev yek li cem civaka navdewletî were şopandin.
Serkirdên YPJ ji hêleke din ve tekez dikin ku binpêkirinên leşkerî yên artêşa Tirkiyê ta niha berdewam in û ev yek erkên civaka navdewletî û hevalbendên Tirkiyê di NATOyê de zêdetir dike.
Berdevka Yekîneyên Parastina yên Jin (YPJ) Nisrîn Ebdela li ser vê yekê ji K24ê re wiha axivî: “Me bal kişand li ser wê yekê ku Tirkiye dixwaze di demên pêş de derbasî herêmên din Sûriyê û divê gelê me yê Sûrî ji vê yekê hişyar be. Rêjîm ne xwedî helwesteke cidî ye ku axa vî welatî biparêze, gerek e gelê Sûrî bibin xwediyê wê helwestê û ew axa xwe biparêzin.”
Di korbenda navdewletî de akademesyen û pispor ji Sûriyê û Ewrupa beşdar in û belge û semînar amade kirine. Hin akademesyenên beşdar giringiyeke mezin didin vê korbendê, nemaze ji aliyê rastiya binpêkirinên artêşa Tirkiyê di Efrînê de. Didin zanîn jî ku çalakiyên hevawa defetekê didin, da deng û êşa bajarê Efrînê rasterast bighêje raya cîhanî, herwiha da ku akademisyenên cîhanî bi xwe vê rastiyê bibînin û nerînên xwe veguhêzin dewlet û hikûmetên xwe.
Rêveberê Navenda Lîkolînên Sûriyê D. Xalid Îsa ji K24ê re got: “Ev çalakiyên wiha ji bo ragihandinê û agahiyên tiştên li ser erdê çê dibin girîng in û bi beşdariya pispor û rojnamevanên navdewletî de rastî ronî dibe. Gelek pisporên navdewletî jî li ser vê yekê axivîn û hîn jî dê bipeyivin. Jixwe ragihandin û gotina pisporan bandora wan li ser raya giştî û navendên xwedî biryar hene.”
Korbenda Navdewletî a Korbenda Paqijkirina Nijadî û Guhertina Demografî li Efrînê 3 rojan didome û biryar e di roja 3emîn de kesayetên beşdar nerîn û pêşinyarên xwe li ser çawayîna dîtina çareseriyê bidin hev û ji bo raya giştî were weşandin.