Siyasî

Pentagon: Em behsa vegera artêşa Sûrya ji bo Efrînê nakin

Hikûmeta Sûrya ji bo ku derbasî Efrînê bibe merc daniye ku, Yekîneyên Parastina Gel (YPG) çekên xwe radestî artêşa Sûryê bikin.

Kurdistan24 Hewlêr 2018/02/16 05:15

kurdistan Amerîka Efrîn YPG Tirkiye Sûrya

K24 - Navenda Nûçeyan

Wezareta berevaniya Amerîka (Pentagon) ragihand, pirsa vegera artêşa Sûrya ji bo Efrînê û rêketina wê li gel Kurdan, di nav karên taybet yên wezareta derve ya Amerîka de nayê behskirin.

Peyvdarê Pentagonê Eric Bahon got: "Wezareta berevaniya Amerîka ti piroseyeke serbazî li Efrînê encam nade. Eger Kurd û Hikûmeta Sûryê lihev bikin, wê ew kar pêwendî bi wezareta derve ya Amerîka ve hebe nek bi Pentagonê".

Berî niha jî hat ragihandin, ku Kurd û Hikûmeta Sûrya gihiştine rêketinekê ji bo artêşa Sûryê vegere Efrînê, lê ew nûçe ji aliyê nûçegihanê RT ve hat redkirin.

Nûçegihanê wê kenalê got: "Hikûmeta Sûrya merc daniye ku, Yekîneyên Parastina Gel (YPG) çekên xwe radestî artêşa Sûryê bikin, lê YPG ew merc red kiriye û herdu alî negihiştine ti rêketinekê".

Artêşa Tirkiyê di 20ê meha derbasbûyî de, bi hevkariya hin ketîbeyên ser bi opozisyona Sûryê ve, dest bi operasyona (Şaxê Zeytûnê) kir li Efrînê û heya niha ew operasyon berdewam dike.