Israîlê mûşekek Patriot li ser ezmanê Sûryê bikar anî

K24 - Navenda Nûçeyan

Peyvdarê Artêşa Israîlê Afikhay Adrai ragihand, ku firokeyeke bêfirokvan li ser ezmanê Sûryê dixwest nêzîkî Colanê bibe, lê hêzên Israîlî bi mûşekek Patriot rê li ber wê firokeyê girtin.

Medya Israîlî diyar kir, ku dengê fîkeyên hişyariyê yên Artêşa Israîlî li nav Colanê hat bihîstin.

Li ser wê yekê Adrai zelal kir, ku ji ber bikaranîna mûşekên Patriot li dijî wê firokeyê, fîkeyên hişyariyê lê dan.

Ev çendîn car in li ser sînorên herdu welatan alozî derdikevin, ji aliyê xwe ve jî, berpirsên Israîlî, bi awayekî berdewam gefê li Hikûmeta Sûryê dikin, ku heger hêzên rêjîmê nêzîkî Colanê bibin, wê Israîl bêdeng nemîne û bersiveke bihêz bide.

Di 8ê vê mehê de, jêderekî serbazî ji nav Artêşa Sûryê ragihand, ku hêzên wan yên berevaniya ezmanî, rê li ber êrîşeke firokeyên Israîlî li dijî bingeha T4 a serbazî girtin.

Wî jêderî diyar kir, ku berevaniya wan ya ezmanî çend mûşekên Israîlî anî xwarê û li firokeyeke cengî jî da, bi wê yekê firokeyên mayî êrîşa xwe bidawî anîn û ji ezmanê Sûryê derketin.

Li ser wê êrîşê, Çavdêrgeha Sûrî ji bo Mafên Mirovan tekez kir, ku di wê êrîşa mûşekî de, li ser bingeha T4 ya serbazî li gundewarê Himsê, hejmarek ji çekdarên Îranî û yên Hizbullaha Lubnanî hatin kuştin.

Ji aliyê xwe ve, Artêşa Israîlî red kir ku bersiva daxuyaniyên wî jêderê Artêşa Sûryê bide, ku Israîl bi encamdana wê êrîşê tometbar kiribû.

Peyvdarê Artêşa Israîlê ragihand, ew bersiva wan raporan nadin, ku di medya biyanî de belav dibin.

N.O