Kurdistan KCK: PKK ji Şengalê venakişe

KCK: PKK ji Şengalê venakişe

K24 – Navenda Nûçeyan

Koma Civakên Kurdistanê (KCK) ragihand, daxuyaniyên Berdevkê Hikûmeta Herêma Kurdistanê Safîn Dizayî yên derbarê vekişandina PKKê ji Şengalê ne rast in.

Komîteya Dîplomasiyê ya KCK'ê daxuyaniyek belav kir û de hat gotin, "Em nizanin bê Birêz Sefîn Dîzay li gorî çi ev daxuyanî daye" û hat bibîrxistin, ku ne PKK'ê ne jî fermandarên gerîla, ti daxuyaniyek li ser derketina gerîla ji Şengalê nedane.

Herwiha KCK balê dikişîne li ser rêvebirina Şengalê û diyar dike ku, kengî Êzidî bûn xwedî hêza xweparastin û rêveberiya xweser, hingî wê armanca gerîla ya li Şengalê bi cih hatibe. Lewma bêyî pêkhatina vê yekê, xistina rojevê ya derketina gerîla tê wateya nedîtina fermana 74'an.

KCK hebûna Pêşmergeyan a li Şengalê jî wekî pirsgirêk binav dike û dibêje, dema xelkê Şengalê karî xwe bi xwe bi rê ve bibe wê demê pirsgirêka hebûna gerîlla û Pêşmergeyan jî çareser dibe.

Ji aliyekî din ve KCK jî amaje dike, danûstandinên wan digel PDKê de berdewam in. Ti rojeveke wan a derbarê vekişandina PKKê ya ji Şengalê nîne.

Sefîn Dizayî berî niha ragihandibû ku, PKK dê ji Şengalê vekişe û sipasiyên xwe jî anîbû ziman.