Siyasî

Televizyona Sûryê: Artêşa Sûryê derbasî Efrînê dibe

Berî niha hevseroka kantona Efrînê Hêvî Mistefa red kir, ku artêşa Sûryê di çend rojên dahatî de derbasî nav Efrînê bibin

Kurdistan24 Hewlêr 2018/02/19 09:26

kurdistan Efrîn Sûrya Tirkiye YPG

K24 - Navenda Nûçeyan

Peyvdarê YPGê li Efrînê Birûsk Hesekê ji Kurdistan24ê re ragihand, ku heya niha ti rêketin di nav wan û artêşa Sûryê de çênebûye ku ew artêş derbasî bajarê Efrînê bibe.

Birûsk Heseke diyar kir, ku hin xelkê sivîl ji Helebê tevlî YPGê bûne, daku li gel wan bergiriyê li Efrînê bikin.

Ji aliyê xwe ve televizyona fermî ya Hikûmeta Sûryê tekez kir, ku biryar e di çend demjimêrên bê de, hêzên taybet yên artêşa Sûryê, derbasî nav bajarê Efrînê bibin, ew jî li gorî‌ rêketinekê ku di navbera YPGê û Hikûmeta Sûryê de hatiye kirin

Ew rêketina YPG û Hikûmeta Sûryê, ji bo radestkirina Efrînê, piştî êrîşên vê dawiyê yên Tirkiyê hat û çendîn civîn jî di navbera YPG û Hikûmeta Sûryê de ji bo vê armancê hatin lidarxistin.

Berî niha hevseroka kantona Efrînê Hêvî Mistefa red kir, ku artêşa Sûryê di çend rojên dahatî de derbasî nav Efrînê bibin, lê duh Bedran Çiya berpirs di rêveberiya xweser de ragihandibû, ku ew li gel Hikûmeta Sûryê rêketine û di çend rojên bê de wê artêşa Sûryê derbasî Efrîn bibe.