Rêveberiya Xweser daxwaza xwepêşandanan bo Efrînê dike

K24 – Amûde

Encûmena Cîbicîkar ya Cezîrê di daxuyaniyekê de bang li xelkên Rojavayê Kurdistanê dike da ji bo piştevaniya bajarê Efrînê derkevin xwepêşandanan. Di salvegera dagîrkerina Efrînê de serkirdên Rêveberiya Xweser eşkere dikin jî ku ewê fişarên xwe li civaka navdewletî zêde bikin, da xelkên Efrînê vegerin li ser mal û milkên xwe.

Bi helkefta salvegera şerê li dijî Efrînê Encûmena Cîbicîkar ya Cezîrê bang li hemû xelkên Rojavayê Kurdistanê dike derkevin xwepêşandanan û amaje bi wê yekê dikin ku tevî berdewamiya binpêkirinan ji aliyê çekdarên alîgirên Tirkiyê ve lê civaka navdewletî der barê dagirkeriya Turkiyê bê deng maye.

Ji beriya salekê ve bi piştevaniya artêşa Tirkiyê girûpên çekdar yên bi ser opozîsyona Sûriyê ve dest danîne ser mal û zeviyên xelkên Efrînê, serkirdên Rêveberiya Xweser jî ji bo eşkerekirina van binpêkirinan gelek hevdîtin bi berpirsên hin dewletên Ewrupî û Amerîka re lidar xistine. Serkirdên Rêveberiya Xweser didin zanîn jî ku ewê di belavkirina kiryarên girûpên dagirker de berdewam bin, herwiha dê fişarên xwe jî li ser dewletên xwedî hêz zêdetir bikin da bajarê Efrînê radestê xelkên wê bibe.

Di 20ê meha Çile ya 2017an de artêşa Tirkiyê di gel girûpên çekdar yên opozîsyona Sûriyê şerek li dijî bajarê Efrînê dest pê kirin û ta nuha li gorî saziyên mafê mirovan xelkên Efrînê rastî gelek binpêkirinan tên, ji bilî ku hejmarek mezin ji xelkên Efrînê nikarin vegerin bajarê xwe.