Tirkiye gefa hilweşandina hevpeymaniyê du alî li Amerîka dike

K24 - Navenda Nûçeyan.

Serokê Tirkiyê Receb Tayip Erdogan gef li Amerîka kir, daku fişarên xwe li ser welatê wî rawestîne û got: Heger Amerîka dev ji bêrêziya li dijî Tirkiyê bernede, wê hevpeymaniya me bidawî bê.

Erdogan ji rojnameya New York Times re gotarek nivîsiye û têde dilgiraniya welatê xwe beramberî fişarên Ameîrka dide xuyakirin û dibêje: Li Tirkiyê bizaveke kudetaya serbazî hat encamdan, lê Amerîka ew kudeta bi zimanekî zelal şermezar nekir û nerazîbûneke ciddî nîşan neda.

Serokê Tirkiyê dibêje: Çawa kesekî weke Gulen, ku bizava kudetaya serbazî li dijî Hikûmeta hilbijartî ya Tirkiyê kiriye û çend endamên AKPê di wê kudetayê de kuştiye, Amerîka wî li cem xwe dihêle û ne amade ye radestî Enqerê bike?.

Got jî: Amerîka li Sûryê piştevaniya YPGê dike, ku baskê PKKê ye û Amerîka PKKê weke girpûeke terorîst daye nasandin û tevî wê yekê jî, gellek barên çekan radestî YPG kiriye. YPG jî wan çekan li dijî welatiyên Tirkiyê bikar tîne.

Serokê Tirkiyê derbarê Efrînê got: Sedema êrîşa li ser Efrînê ew bû, ku Amerîka guhdarî li dengê Tirkiyê nedikir, ji ber wê yekê jî, Tirkiyê ji bo parastina berjewendiyên xwe yên niştimanî, her tiştî dike.

Derbarê zindanîkirina keşeyê Amerîkî li Tirkiyê, Erdogan diyar kir, ku ew keşe bi alîkarîkirina girûpa terorsît hatiye tometbarkirin û got: Pêwîst bû Amerîka rêzê li biryara dadgehê bigire neku gefê li me bike.

Serokê Tirkiyê tekez kir, ku heger Amerîka dev ji bêrêziya li dijî welatê wî bernede, wê hevpeymaniya di navbera herdu welatan de bidawî bê û Tirkiye wê hevpeymaniyê li gel hin welatên din bike.

N.O