کۆمەڵە کوردییەکان له‌ مۆسكۆ داوایه‌ك ئاراسته‌ی لایه‌نه‌ سیاسییه‌كان ده‌كه‌ن

K24 – مۆسكۆ:

ژماره‌یه‌ك  ‌رۆشنبیر و نوێنه‌رانی رێكخراو و سه‌نته‌ره‌ كولتوورییه‌كانی كورد له ‌رووسیا، به ‌به‌شداری ژماره‌یه‌ك قوتابی باشوور و رۆژئاوا و باكووری كوردستان له‌شاری مۆسكۆ پاڵپشتی خۆیان بۆ ریفراندۆمی سه‌ربه‌خۆیی كوردستان ده‌ربڕی.

گردبوونه‌وه‌ی ئه‌و قوتابییانه‌ به‌ مه‌به‌ستی ده‌برینی پشتیوانی بۆ ئه‌نجامدانی ریفراندۆمی سه‌ربه‌خۆیی كوردستان بوو، كه‌ بڕیاره‌ 25ی ئه‌یلول/ سێپتێمبه‌ری ئه‌مساڵ ئه‌نجامبدرێت.

به‌شداربووان به‌ئاڵای كوردستان و جلی كوردییه‌وه‌، وێرای دووپاتكردنه‌وه‌ی پشتیوانی خۆیان بۆ پرۆسه‌كه‌، هاوكات داوایه‌كیان ئاراسته‌ی سه‌رجه‌م پارت و لایه‌نه‌ سیاسییه‌كانی باشووری كوردستان كرد، ‌به‌رژه‌وه‌ندی نه‌ته‌وه‌یی و نیشتیمانی له‌به‌ر چاوبگرن و ته‌بایی و یه‌كڕیزی گه‌لی كوردستان بپارێزن بۆ سه‌رخستنی ریفراندۆم و وه‌دیهێنانی هیواو و خه‌ونی له‌مێژینه‌ی گه‌لی كورد.