به‌غدا داوای لیستی ناوی ئه‌و جووتیارانه ده‌كات كە گه‌نمیان داوه‌ته عێراق
K24 - ھەولێر
حكومه‌تی به‌غدا داوای له هه‌رێمی كوردستان كردووه، لیستی ناو ئه‌و جووتیارانه‌ی بۆ ره‌وانه بكات كه پاره‌ی گه‌نمیان لای حكومه‌تی به‌غدایه.
له‌وباریه‌وه، نه‌وزاد ئه‌دهه‌م به‌رێوه‌به‌ری گشتی بازرگانی له وه‌زاره‌تی بازرگانی به كوردستان24 رایگه‌یاند، به‌غدا داوایكردووه لیستی ناو ئه‌و جوتیارانه‌ی بۆ ره‌وانه بكه‌ن كه گه‌نمیان راده‌ستی حكومه‌تی به‌غدا كردووه و پاره‌یان وه‌رنه‌گرتووه.
به‌گوێره‌ی داتاكانی وه‌زاره‌تی بازرگانی هه‌رێمی كوردستان، حكومه‌تی به‌غدا 736 ملیار دیناری پاره‌ی گه‌نمی جووتیارانی كوردستانی لا ماوه، كه پاره‌ی گه‌نمی نێوان ساڵانی 2014 تا 2017یە.
نه‌وزاد ئه‌دهه‌م ئه‌وه‌شی روونكرده‌وه، به‌غدا پێی رانه‌گه‌یاندون كه پاره‌ی قه‌رزه‌كان ده‌ده‌ن، به‌ڵكو ته‌نها داوای لیست و ناوییان كردووه.