توێژینه‌وه‌یه‌كی ئه‌مه‌ریكی په‌ندێكی كوردی پشتڕاست ده‌كاته‌وه‌

"زگم ئه‌مباری بابی كه‌س نییه‌"

K24 - هه‌ولێر:

ده‌سته‌ی ئه‌مه‌ریكی بۆ نه‌خۆشییه‌ ده‌روونییه‌كان راپۆرتێكی بڵاوكردووه‌ته‌وه‌ و تێیدا ده‌ڵێت: "پاراستنی نهێنی و نه‌دركاندنی، كاریگه‌ری نه‌رێنی له‌سه‌ر مێشكی مرۆڤ هه‌یه‌".

تیمی توێژه‌ران له‌ زانكۆی كۆلۆمبیا له‌ نیویۆرك، سامپڵێكی 600 كه‌سیان وه‌رگرتووه‌ و توێژینه‌وه‌یان له‌سه‌ر ئه‌نجامداون، ده‌ركه‌وتووه‌ 96 %یان، نهێنییان هه‌یه‌ و زۆربه‌ی نهێنییه‌كانیش، سۆزداریین.

ئه‌و كه‌سانه‌ی به‌شداری توێژینه‌وه‌كه‌یان كردووه‌، پرسیاری ئه‌وه‌یان لێكراوه‌، له‌ ماوه‌ی مانگێكدا چه‌ند جار بیرییان له‌و نهێنییانه‌ كردووه‌ته‌وه‌، وه‌ڵامه‌كانیان: دووجار بووه‌ و نهێنییه‌كانیش بوونه‌ته‌ هۆی نیگه‌رانی و دڵه‌ڕاوكێ بۆیان.

توێژینه‌وه‌كه‌ ئه‌وه‌شی ئاشكرا كردووه‌، سه‌رچاوه‌ی نیگه‌رانییه‌كه‌ ناوه‌ڕۆكی نهێنییه‌كه‌ نییه‌، به‌ڵكو پرۆسه‌ی پارێزگاریكردن له‌ نهێنییه‌كه‌ سه‌رچاوه‌ی دڵه‌ڕاوكێ و نیگه‌رانییه‌كه‌یه‌.

توێژینه‌وه‌كه‌ دووپاتیشی كردووه‌ته‌وه‌، زۆربه‌ی به‌شداربووانی توێژینه‌وه‌كه‌ كه‌ وه‌ك سامپڵ وه‌رگیراون، دووچاری ئازاری ویژدانی و ده‌روونی ده‌بن كاتێك ئه‌و نهێنییه‌ ناخۆشانه‌یان بیرده‌كه‌وێته‌وه‌ و نه‌یاندركاندووه‌.

ئه‌و توێژینه‌وه‌ ئه‌مه‌ریكییه‌، په‌ندێكی كوردی یه‌كده‌گرێته‌وه‌، كه‌ په‌یوه‌ندیی دركاندنی نهێنییه‌وه‌ هه‌یه‌ و ده‌ڵێت: "زگم ئه‌مباری بابی كه‌س نییه‌".