زانایان جۆرە ئەسپێکی لەناوچوو دەدۆزنەوە

K24 – هه‌ولێر:

زانایان جۆرە ئەسپێکی لەناوچووی بەستوویان دۆزیووەتەوە کە مێژووەکەی بۆ 40 هەزار ساڵ لەمەوبەر دەگەڕێتەوە و هیوای بە دونیا هێنانەوەی چەند ئاژەڵێکی لەناوچووی داونەتێ.

تیمێکی رووسی و کۆری، ئەو ئەسپەیان لە ساردترین شاری جیهان، شاری یاکوتسک لە رووسیا، دۆزیوەتەوە و تەمەنی تەنها 20 رۆژ بووە کاتێک مردووە.

د. سێمیۆن گریگۆریڤ، بەڕێوەبەری توێژینەوەکە بە رۆژنامەی دەیلی مەیلی راگەیاندووە: "خۆشحاڵانە، بەستەرە ماسوولکەییەکانی ئەو جۆرە ئەسپە زیانیان پێنەگەیشتووە و باش پارێزراون، بۆیە دەتوانین نموونەی لێوەربگرین و لە تەکنەلۆجیای زیندەوەرزانی بەکارییان بهێنین".

دەشڵێت: "گەر بتوانین دی ئێن ئەی زیندوو لەو بەچکە ئەسپە بدۆزینەوە، ئەوا دەتوانین جارێکی دیکە ئەو جۆرە ئەسپە دروست بکەینەوە"

هەر ئەو تیمە لە هەوڵی ئەوەدان جارێکی دیکە مامووسەکان و چەند ئاژەڵێکی دیکەی لەناوچوو بۆ ژیان بگەڕێننەوە و بۆ ئەو مەبەستەش شەش ملیۆن دۆلاریان تەرخانکردووە و سەرۆکی رووسیاش، ڤلادمیر پوتن، پاڵپشتییان دەکات.

H.J