رووسیا واده‌ی ناردنی ئێس400ی بۆ توركیا ئاشكرا كرد

به‌شێكی ئه‌و سیستمه‌ له‌سه‌ر خاكی توركیا دروست ده‌كرێت

K24 – هه‌ولێر:

سه‌رۆكی دامه‌زراوه‌ی رووسیا بۆ هه‌نارده‌كردنی چه‌ك، "ئه‌لیكسه‌نده‌ر میگییڤ"، رایگه‌یاند، یه‌كه‌م كاروانی سیستمی به‌رگریی مووشه‌كی ئێس400 له‌ مانگی ته‌مموز/ یۆلیۆی ئه‌مساڵدا ره‌وانه‌ی توركیا ده‌كرێت.

گوتیشی: "مۆسكۆ و ئه‌نقه‌ره‌ رێككه‌وتوون، به‌شێكی ئه‌و سیستمه‌ له‌سه‌ر خاكی توركیا دروست بكرێت".

هه‌روه‌ها گوتی: "ئێمه‌ هه‌موو شتێكمان تاووتوێ كردووه‌. له‌سه‌ر هه‌موو شتێكیش رێككه‌وتووین و هه‌ماهه‌نگیمان هه‌یه‌. له‌ چوارچێوه‌ی گرێبه‌سته‌كه‌ماندا كار ده‌كه‌ین".

ئه‌لیكسه‌نده‌ر میگییڤ باسی له‌وه‌ش كرد، رووسیا و توركیا، پرسی پێشخستنی پرۆگرامی پرۆژه‌كانیان له‌ بواری به‌رهه‌مهێنانی بزوێنه‌ر، فڕۆكه‌ و هێلیكۆپته‌ر تاووتوێ كردووه‌ و هه‌ماهه‌نگیی ته‌واو له‌ نێوانیاندا هه‌یه‌.

توركیا به‌ بڕی دوو ملیار و نیو، چوار تیپی سیستمی به‌رگریی مووشه‌كی "ئێس400"ی رووسی كڕیوه‌ و ئه‌وه‌ش بووه‌ته‌ جێی نیگه‌رانیی ئه‌مه‌ریكا و په‌یمانی باكووری ئه‌تڵه‌سی.

سه‌رچاوه‌: RT

ئ.ر