په‌رله‌مانی عێراق كابینه‌كه‌ی عه‌بدولمه‌هدی ته‌واو ده‌كات
K24 - هه‌ولێر:
ئەمڕۆ ئەنجوومەنی نوێنەرانی عێراق لە بارەی پرۆژه یاسای بودجەی 2019ی عێراق و تەواوکردنی کابینەکەی عادل عەبدولمەهدی کۆدەبێتەوە.
محەمەد حەلبووسی، سەرۆکی ئەنجوومەنی نوێنەرانی عێراق رایگەیاند، ئەمرۆ 23ی كانوونی دووه‌م/ یه‌نایه‌ری 2019، پەرلەمان لەبارەی پرۆژه یاسای بودجەی 2019 و تەواوکردنی کابینەی نوێی حكوومه‌ته‌كه‌ی عادل عه‌بدولمه‌هدی کۆدەبێتەوە.
حەلبووسی ئاشکراشیکرد، پێنجشەممەی داهاتوو عادل عەبدولمەهدی سه‌رۆك وه‌زیرانی عێراق لە دانیشتنی پەرلەمان ئامادە دەبێت بەبێ ئەوەی هۆکاری ئامادەبوونەکەی ئاشکرا بکات.
دوای تێپه‌ڕبوونی زیاتر له 7 مانگ به‌سه‌ر هه‌ڵبژاردنی خوولی چواره‌می ئه‌نجوومه‌نی نوێنه‌رانی عێراق، تا ئێستا كابینه‌ی نوێ به ته‌واوه‌تی پێكنه‌هێنراوه، ئه‌وه‌ش به‌هۆی مانه‌وه‌ی پۆسته‌كانی وه‌كو وه‌زاره‌تی ناوخۆ، به‌رگری.
هۆكاره‌كه‌شی بۆ ناكۆكی نێوخۆیی پێكهاته‌ی شیعه و سووننه‌كان ده‌گه‌ڕێته‌وه، كه له‌ناوخۆیان نه‌یانتوانیوه بگه‌نه رێككه‌وتن له‌سه‌ر دیاری كردنی كه‌سێك، كه وه‌زاره‌تی به‌رگری پشكی سوننه و ناوخۆش پشكی شیعه‌یه.
ئ. م