ساڵح موسليم: يه‌ك مه‌رجمان بۆ رێككه‌وتن له‌گه‌ڵ ديمه‌شق هه‌يه‌

هه‌رگيز سووريا ناگه‌ڕێته‌وه‌ دۆخى پێشووى خۆى

K24 – هه‌ولێر:

هاوسه‌رۆكى پێشووى پارتى يه‌كێتى ديموكرات(په‌يه‌ده‌) ساڵح موسليم، رايگه‌ياند، له‌ دانووستانه‌كانمان له‌گه‌ڵ ديمه‌شق ده‌ست به‌ ئيداره‌ى خۆبه‌ڕێوبه‌رييه‌وه‌ ده‌گرين.

له‌ لێدوانێكدا بۆ ئاژانسى هه‌واڵده‌رى فرانس پرێس، ساڵح موسليم گوتى: "هه‌وڵده‌ده‌ين پارێزگارى له‌و ده‌ستكه‌وتانه‌ بكه‌ين، كه‌ چه‌ند ساڵێكه‌ به‌ ده‌ستمان هێناوون و جه‌خت له‌ پاراستنى سيستمى ئيداره‌ى خۆبه‌ڕێوبه‌رى ديموكراتيك و دامه‌زراوه‌كانى ده‌كه‌ين".

گوتيشى: "هه‌رگيز سووريا ناگه‌ڕێته‌وه‌ دۆخى پێشووى خۆى و پێويسته‌ سيستمى لامه‌ركه‌زى و ديموكراتى قبوڵ بكرێت".

جه‌ختيشى له‌سه‌ر ئه‌وه‌ كرده‌وه‌، "كورد له‌ سووريا پرۆژه‌يه‌كى نموونه‌يى هه‌يه‌ و ئێمه‌ پابه‌ندين به‌ به‌رگريكردن له‌و پرۆژه‌يه‌ى خۆمان".

هيواشى خواست، حكومه‌تى سووريا ده‌ستبه‌ردارى هه‌ڵوێسته‌كانى پێشووى ببێت سه‌باره‌ت به‌ كورد و گوتى: "ئێمه‌ وه‌ك جاران نيين. ئه‌مڕۆ له‌ هه‌موو هاوكێشه‌كاندا گۆڕانكاريمان هێناوه‌ته‌‌ ئاراوه‌ و ئه‌مه‌ش به‌ ئيراده‌ و رێكخستن و به‌رگرى خۆمان بووه‌ و به‌رگريش له‌وه‌ ده‌كه‌ين كه‌ بنياتمان ناوه‌".

هه‌ر له‌و باره‌يه‌وه‌، هاوسه‌رۆى ئه‌نجوومه‌نى سوورياى ديموكرات، ئيلهام ئه‌حمه‌د، رايگه‌ياند، ئيداره‌ى خۆبه‌ڕێوبه‌رى يه‌كێكه‌ له‌ ده‌ستكه‌وته‌كانى شه‌ڕى كورد له‌ دژى داعش و پرسى كورد له‌ سووريا يه‌كێكه‌ له‌و پرسانه‌ كه‌ ده‌بێت پێش هه‌موو پرسه‌كانى ديكه‌ چاره‌سه‌رى بۆ بدۆزرێته‌وه‌.

له‌ كۆتايى مانگى رابردوودا پرۆسه‌ى دانووستانى نێوان كورد و حكومه‌تى سووريا ده‌ستيپێكرد و هه‌ردوولا بڕيارياندا ژماره‌يه‌ك ليژنه‌ى راپه‌ڕاندن بۆ پێشخستنى دانووستانه‌كان پێكبهێنن.

ئ.ر