سياسه‌تمه‌دارانى كورد: ئامانجى هێرشه‌كه‌ى توركيا بۆ سه‌ر رۆژهه‌ڵاتى فورات له‌ناوبردنى ده‌ستكه‌وته‌كانى كورده
K24 – قاميشلۆ:
توركیا له ناردنی هێز بۆ سنووره‌كانی رۆژئاوای كوردستان به‌رده‌وامه و چاودێرانی سیاسیش پێیان وایه به‌بێ مۆڵه‌ت وه‌رگرتن له ئه‌مریكا توركیا ناتوانێت ئۆپه‌راسیۆنی سه‌ربازی ئه‌نجامبدات.
سیاسه‌تمه‌دارانی كورد هۆشداری له‌و باره‌وه به توركیا ده‌ده‌ن و ده‌ڵێن: ئامانج له‌و ئۆپه‌راسیۆنه‌ی توركیا له‌ناوبردنی ده‌ستكه‌وتی كورده و ئه‌نجامی شه‌ڕه‌كه‌ش گران ده‌بێت.
له په‌یوه‌ندییه‌كی ته‌له‌فۆنیدا، له‌گه‌ڵ وه‌زیری ده‌ره‌وه‌ی ئه‌مریكا، مه‌ولوود چاوشئۆغڵو وه‌زیری ده‌ره‌وه‌ی توركیا، ئه‌مریكای له نیازی وڵاته‌كه‌ی له ده‌ستپێكردنی هێرشى سه‌ربازى بۆ سه‌ر رۆژهه‌ڵاتی فورات ئاگادار كرده‌وه.
ئه‌مه له كاتێكدايه ئه‌مه‌ريكا هۆشدارى دابووه توركيا سه‌باره‌ت به هێرشكردنه سه‌ر ناوچه‌كانى باكوور و رۆژهه‌ڵاتى سووريا.
له‌و باره‌يه‌وه، وه‌زاره‌تى به‌رگرى ئه‌مه‌ريكا (پێنتاگۆن)، هۆشدارى دايه ئه‌نقه‌ره له باره‌ى هێرشكردنه سه‌ر هاوپه‌يمانه كورده‌كانى وڵاته‌كه‌ى له باكوورى سووريا و رايگه‌ياند، ئه‌و بابه‌ته به هيچ شێوه‌يه‌ك قبووڵكراو نييه.
گوته‌بێژى وه‌زاره‌تى به‌رگرى ئه‌مه‌ريكا، شۆن رۆبرتسۆن، رايگه‌ياند، هه‌نگاو نانى سه‌ربازى يه‌كلايه‌نانه له باكوورى سووريا به تايبه‌تى له‌و ناوچانه‌ى تيمى ئه‌مه‌ريكى لێيه مايه‌ى نيگه‌رانى زۆرى ئێمه‌يه و هيچ جۆره كرده‌وه‌يه‌كى له‌و جۆره قبوڵ ناكرێت.
ئه‌م هۆشدارييه‌ى ئه‌مه‌ريكا دواى ئه‌وه هات، سه‌رۆكى توركيا، ره‌جه‌ب ته‌يب ئه‌ردۆغان، دوێنێ هه‌ڕه‌شه‌ى په‌لاماردانى ناوچه‌كانى رۆژهه‌ڵاتى فورات و ژێر ده‌سه‌ڵاتى هه‌سه‌ده‌ى له باكوورى سووريا كرد.
ئه‌ردۆغان راشيگه‌ياند، له چه‌ند رۆژى داهاتوودا هێرش ده‌كه‌ينه سه‌ر رۆژهه‌ڵاتى فورات.
هه‌ر له‌و چوارچێوه‌يه‌دا دوێنێ ئه‌نجوومه‌نى راپه‌ڕاندنى ئيداره‌ى خۆبه‌ڕێوبه‌رى له باكوور و رۆژهه‌ڵاتى سووريا "نه‌فير عام"ى راگه‌ياند، به مه‌به‌ستى ئاماده‌كارى بۆ به‌رگرتن له له‌شكركێشى سوپاى توركيا و وه‌ڵامدانه‌وه‌ى هه‌ڕه‌شه‌كانى ره‌جه‌ب ته‌يب ئه‌ردۆغان.
له به‌ياننامه‌يه‌كدا ئه‌نجوومه‌نه‌كه، وێڕاى ئيدانه‌كردنى هه‌ڕه‌شه‌كانى ئه‌ردۆغان كه به "دوژمنكارانه" وه‌سفيكردوون رايگه‌ياند، "ئه‌ردۆغان هه‌ر له سه‌ره‌تاى قه‌يرانى سوورياوه ده‌يه‌وێت به‌شێك له خاكى سووريا داببڕێت و بيلكێنێت به توركياوه و هه‌وڵى ئه‌وه ده‌دات سنوورى ميساقى ميللى عوسمانى بگێڕێته‌وه".
هه‌روه‌ها هاتووه: "ئه‌ردۆغان ئامانجى ته‌نيا باكوور و رۆژهه‌ڵاتى سووريا نييه، به‌ڵكو ئامانجى له‌تكردنى خاكى سووريايه. ئه‌مه‌ش له كاتێكدايه داعش له دێرزوور له گيانه‌ڵادايه و له‌و رێگه‌يه‌وه ئه‌ردۆغان ده‌يه‌وێت به داگيركردنى سووريا بارگرانى سه‌ر داعش كه‌مبكاته‌وه و ته‌مه‌نى ئه‌و رێكخراوه تيرۆريستييه درێژ بكاته‌وه".
له به‌شێكى ديكه‌ى به‌ياننامه‌كه‌دا هاتووه: "ئامانجى توركيا تێكدانى پێكهاته‌ى ژيانى كۆمه‌ڵايه‌تى سووريا و به‌يه‌كه‌وه ژيان و برايه‌تى نێوان پێكهاته‌كانى سووريايه و ئه‌و لێدوانه دوژمنكاريانه‌ى بۆ لێدانى ئه‌و ده‌ستكه‌وتانه‌يه كه له شه‌ڕى دژ به داعش به‌ده‌ستهاتوون و هه‌روه‌ها ده‌يه‌وێت ئاسايش و ئارامى گه‌له‌كه‌مان له سووريا و رۆژهه‌ڵاتى فورات له‌ناو به‌رێت".
ئيداره‌ى خۆ به‌ڕێوبه‌رى راشيگه‌ياندووه، "ئێمه داوا له كۆمه‌ڵگه‌ى نێوده‌وڵه‌تى له سه‌روويانه‌وه نه‌ته‌وه‌يه‌كگرتووه‌كان و هاوپه‌يمانى نێوده‌وڵه‌تى ده‌كه‌ين، كه هه‌ڵوێستێكى جدى دژى ئه‌و پيلانه دوژمنكاريانه‌ى ئه‌ردۆغان بگرنه به‌ر چونكه دژى هه‌موو ياسايه‌كى نێوده‌وڵه‌تين".
ئه‌نجوومه‌نى راپه‌ڕاندنى ئيداره‌ى خۆبه‌ڕێوبه‌رى له باكوور و رۆژهه‌ڵاتى سووريا داواشى له حكومه‌تى سووريا كردووه، هه‌ڵوێستێكى ره‌سمى دژى ئه‌و هه‌ڕه‌شانه‌ى ئه‌ردۆغان هه‌بێت چونكه ئه‌ردۆغان ده‌يه‌وێت به‌شێك له سووريا داگير بكات و ئه‌مه‌ش ده‌ستدرێژييه بۆ سه‌ر سه‌روه‌رى سووريا.
داواشى له هێزه ديموكراسيخوازه‌كانى ناوچه‌كه و جيهان كردووه، له‌گه‌ڵ ئيراده‌ى خه‌ڵكى ناوچه‌كه‌دا بن و وه‌ك چۆن دژى داعش هاوكاريان كردن، به‌و جۆره‌ش دژى ئه‌و شه‌ڕه كۆمه‌ڵكوژييه‌ى ئه‌ردۆغان له دژيان رايگه‌ياندووه، بێنه ده‌نگ و پشتيوانيان لێ بكه‌ن.