باشووری کوردستان "ورچه‌كه‌ كوژرا"

"ورچه‌كه‌ كوژرا"
یه‌كێك له‌ ورچه‌كان له‌ ناو ماڵه‌كانی ناوچه‌كه‌دا

K24 - هه‌ولێر:

دواى ئه‌وه‌ى رێكخراوێكى ژينگه‌پارێز و ئاژه‌ڵدۆست، ژماره‌يه‌ك ورچى له‌ ناوچه‌يه‌كى سرووشتى و كراوه‌ی هه‌رێمی كوردستاندا ئازاد كرد، چه‌ند شه‌وێك پێش ئێستا یه‌كێك له‌ ورچه‌كان له‌ ناو ماڵ و گه‌ڕه‌كه‌كانى قه‌زای چۆمان و شاره‌دێى حاجى ئۆمه‌رانى سنووریی بينرا‌.

به‌گوێره‌ی ئه‌و زانیارییانه‌ی له‌ فانه‌كانی په‌یجی كوردستان24 به‌ ده‌ستمان گه‌یشتووه‌، ئه‌مڕۆ یه‌كێك له‌و ورچانه‌ له‌ دۆڵی ئالانه‌ی سه‌ر به‌ قه‌زای چۆمان كوژراوه و تا ئێستا زانیاری ورد له‌سه‌ر بكوژی ورچه‌كه‌ له‌ به‌رده‌ستدانییه‌‌.

به‌گوێره‌ی زانیارییه‌كانی هاوڵاتییه‌كی نزیك له‌و گونده‌ی"ورچه‌كه‌ی تێدا كوژراوه‌" رووداوه‌كه‌ ئه‌مرۆ روویداوه‌، پاش ئه‌وه‌ی ئه‌و ورچه‌ ئازاد كراوه‌ و له‌ كێو و دۆڵه‌كانی ناوچه‌كه‌ به‌ره‌ڵاكراوه‌، ئه‌مڕۆ كوژراوه‌.

له‌ كاتی بڵاوبوونه‌وه‌ی وێنه‌كانی یه‌كێك له‌و ورچانه‌ كه‌ وه‌ك دۆستی مرۆڤه‌كان ده‌رده‌كه‌وتن، له‌ تۆڕه‌ كۆمه‌ڵایه‌تییه‌كانه‌وه‌ خه‌ڵكی خۆشحاڵی خۆیان به‌ كلتووری رێزگرتن له‌ ئاژه‌ڵه‌كان ده‌ربڕی و وه‌ك سه‌روه‌تێكی نیشتیمانی و ژینگه‌ی كوردستان ئه‌ژمار ده‌كران.

ئه‌م هه‌واڵه‌ له‌ تۆڕه‌ كۆمه‌ڵایه‌تییه‌كاندا بڵاوكراوه‌ته‌وه‌ و هێشتا هیچ لایه‌نێكی فه‌رمی ناوچه‌كه‌ به‌ تایبه‌تی دامه‌زراوه‌ و رێكخراوه‌ ژینگه‌ پارێزه‌كان، ده‌رباره‌ی كوژرانی ئه‌و ورچه‌ هیچ لێدوانێكیان نه‌داوه و پشتڕاست نه‌كراوه‌ته‌وه‌ كه‌ ئایا هه‌مان ئه‌و ورچه‌یه‌ وێنه‌كانی بڵاوكرایه‌وه‌ یان یه‌كێكی دیكه‌یه‌ له‌و ورچانه‌ی هێنرابوونه‌ ژینگه‌ی ناوچه‌كه‌‌.