تانکەرێکی سووتەمەنی لەڕێگای کۆیە گڕدەگرێت و ژیانی شۆفێرەکەی لەمەترسیدایە

K24 - هەولێر

بەهۆی گڕگرتنی تانکەرێکی پڕ لە سووتەمەنی، تەواوی جەستەی شۆفێرەکەی دەسووتێت و گیانی لە مەترسیدایە.

پێش نیوەڕۆی ئەمڕۆ (چوارشەممە، 23-9-2020) لە لۆفەکانی کەلکەسماق لە سنووری ناحیەی ئاشتی، رێگای دووکان کۆیە تانکەرێکی سووتەمەنی گڕی گرت و بە تەواوی سووتا.

عەقید گۆران ئەحمەد سماقەیی، بەڕێوەبەری پۆلیسی بەرگری شارستانیی کۆیه بە کوردستان24ـی راگەیاند، "شۆفێرەکە ناوی (م. م.)ـە، خەڵکی کەلارە و لەدایکبووی ساڵی 1997ـە".

بەگوتەی بەڕێوەبەرەکەی پۆلیسی بەرگری شارستانیی کۆیە "تیمەکان توانیویانە ئاگری تانکەرەکە کۆنترۆڵ بکەن، بەڵام زۆرینەی جەستەی شۆفێرەکە سووتاوە و ژیانی لەمەترسیدایە. ئێستاش لە نەخۆشخانەی کۆیە لەژێر چاودێریی پزیشکیدایە".

عەقید گۆران دەڵێ "بەهۆی ئەوەی بارهەڵگرەکە نەوتی سپی تێدابووە و بەسەر لۆفەکەدا هاتووەتە خوارەوە، پێدەچت گەرم بووبێت و هۆکاری گڕگرتنیشی هەر ئەوە بووبێت".

هـ.ر.