وتار قه‌رزارێکی بێ چاووڕوو !!

قه‌رزارێکی بێ چاووڕوو !!

کە بێ دەنگین لەترسا نیە .. لە تێگەیشتنە ..

ساڵ و نیوێکە بێ دەنگین... چونکە تێدەگەین قەیرانی دارایی یانی چی !

ساڵ و نیوێکە حکومەت قەرزارمانەو ئێمەش قەرزاری ئەم و ئەوین و ... بێ دەنگیشین ..

ساڵ و نیوێکە خۆمان و خێزانمان ئازاری چارەکە مووچە دەچێژین ... ئەگەر زۆر  وریا نەبین بەشی کڕینی دەرمانی نەخۆشەییە درێژخایەنەکانمان نامێنێتەوە و بێ دەنگین ... چونکە تێدەگەین هۆکارەکانی ئەو چارەکە مووچەیە چین و تێدەگەین سەربەخۆییش باجەکەی زۆر گرانە !

ساڵ و نیوێکە نەمانتوانیوە وەکوو جاران لە مانگێکدا جارێک .. ئێوارەیەک خێزانەکانمان بانگێشتی رێستۆرانتێ بکەین و بێ دەنگیشین .. چونکە هەموومان تێدەگەین نیشتمانەکەمان تازیەبارە و لە قەیراندایە ...

ساڵ و نیوێکە بەشێکی هەرە زۆری خواست و خەون و حەزەکانمان لە فرێزەر ناوە و بێ دەنگین ... چونکە دەزانیین ڕۆژانە خوێنێکی زۆر زۆر گەرم لە جەستەی کوردستانەکەمان دەچۆڕێ ...

ساڵ ونیوێکە  حکومەتەکەمان بە دەیان ملیۆن دیناری هەریەکەمان ( مووچەخوراو و بەڵێندەر وکۆمپانیا )  قەرزارەو بێ دەنگین ... چونکە تێدەگەین لەم بارودۆخەدا حکومەتەکەمان توانای دانەوەی قەرزەکانی نیە .. ئیتر چ سوودێکی هەیە هەموو رۆژێک هەڵکوتینەسەری و بەرد بهاوێژین و هاواربکەین : قەرزەکانمان بدەرەوە !؟

ساڵ و نیوێکە بێ دەنگین... زۆربەشمان ئامادەین ساڵێکی تریش بێ دەنگ بین ... بەڵاممممممممممممم !!!!

بەڵام ... کە هەندێ وەزارەت و دەزگای ( حکومەتە قەرزارەکەمان ) لەڕێی هەندێ ڕینومایی سەیرو سەمەرە و ناماقوڵەوە بیانەوێ هاوکێشەکە سەرەوژێر بکەنەوەو ( ئێمە بکەن بە قەرزار و خۆیان بە خاوەن قەرز ! ) .... ئەمەیان هەڵوەستەیەکی جددیی گەرەکە !!

کە بچیتە دائیرەی تەنفیز بۆ هەڵگرتنی حیجزی سەر خانوویەک کە بۆ رەهنی دانەوەی قەرزی بانکێکی ئەهلیی  بەر لە سێ ساڵ دانرابوو ... داوای ٦٠٠ تا ٨٠٠  هەزار دینارت لێ بکەن !!

کە وەزارەتی ناوخۆی هەرێم هەڕەشەمان لێ بکات : ئەگەر لە دوو مانگدا پارەی غەرامەی ئوتۆمبێلەکانمان نەدەین دووقاتیان دەکات و ئەگەر هەر نەماندا ئۆتۆمبێلەکانمان حیجز دەکەن و دواتریش لە مەزادا هەرزانفرۆشییان دەکەن !!

ئەگەر وا نەکەین و وا نەچین  واو واومان بەسەر دێنن !!  ئیدی ئەوە ئەوپەڕی نا مەنتقی و ناماقوڵییە وهیچ  قابیلی قبووڵ و بێ دەنگی نیە ...

لێرە بەدواوە  پێویستە بەدەنگی بەرز بپرسین : ئەوانە کێن ئەو ڕاوێژە سەقەتانە بۆ ئەم وەزارەت و دەزگایانەی هەرێم دەکەن ...

کەی ڕەوایە و کەی مەنتقییە حکومەتێک خۆی تا بینەقاقای قەرزاری (مووچەخوراو وبەڵێندەران و کۆمپانیاکان) بێت ... لەبریی ئەوەی بیر لە ئاسانکردنی ژیانیان بکاتەوە .. لەبریی ئەوەی هەندێ ڕیوشوێن دابنێ بۆ ئەوەی هەم ناڕەزایەتیی خەڵکەکەی کەمبکاتەوە و هەم بڕێک لەو قەرزەی لەئەستۆیەتی کەم بکاتەوە ... کەچی لەناکاوا بێت و باج و خەراج و سزا لەسەریان زیادبکات !!

پێویستە بپرسین: ئایا کەس نەبوو لەو وەزارەت و دەزگایانەدا، لەو راوێژکارە ( شەیتانیانە )  بپرسێ : ئەرێ پێمان ناڵێن خەڵک لەکام داهات کام مووچە ئەم هەموو باج و غەرامەو سزایانە بدەن ... لە چارەکە مووچەکەی پەنجا ڕۆژ جارێ !؟

من بۆخۆم گەیشتوومەتە ئەو قەناعەتەی راوێژکارانی ئەم جۆرە ڕێکار و ڕێنوماییانە، یان خۆیان لە تەڕ دەخۆن و لە وشک دەخەون و هیچ ئاگایان لە ژیانی کولەمەرگیی خەڵك نیە ، یان تابووری پێنجەمن و دەیانەوێ ئەوەندەیتر حکومەت لەچاوی خەڵکەکەیدا ناشرین بکەن و دە هێندەی تر ناڕازییان بکەن.

9. sidebar1_home_page