كۆریای باكوور تاقیكردنه‌وه مووشه‌كی و ئه‌تۆمییه‌كانی راگرت
K24 - هه‌ولێر:
ئه‌مڕۆ شه‌ممه 21/4/2018 كۆریای باكوور رایگه‌یاند: "تاقیكردنه‌وه مووشه‌كی و ئه‌تۆمییه‌كانمان هه‌ڵپه‌ساردووه‌و شوێنی تاقیكردنه‌وه‌ی مووشه‌كه‌كانمان خاپوور كردووه‌و ئیتر پێویستمان پێی نییه".
میدیای فه‌رمی كۆریای باكوور بڵاویكردووه‌ته‌وه كه پیۆنگ یانگ تاقیكردنه‌وه ئه‌تۆمی و مووشه‌كییه‌كانی راگرتووه‌و ده‌ستبه‌جێ پێگه‌یه‌كی تاقیكردنه‌وه ئه‌تۆمییه‌كان له باكووری وڵات رووخێنراوه. ئه‌وه‌ش وه‌ك هه‌وڵێك بۆ گه‌شه‌ی ئابووری و ده‌سته‌به‌ربوونی ئاشتی له نیمچه دوورگه‌ی كۆریادا.
ئاژانسی ناوه‌ندی فه‌رمی كۆریای باكوور ده‌ڵێت "كیم جۆنگ ئون، سه‌رۆكی كۆریای باكوور، له به‌یاننامه‌یه‌كدا رایگه‌یاندووه كه چیدیكه پیۆنگ یانگ پێویستی به تاقیكردنه‌وه‌ی ئه‌تۆمی و هه‌ڵدانی مووشه‌كی بالیسیتی كیشوه‌ربڕ نییه و له رووی ئه‌تۆمییه‌وه كۆریا گه‌یشتووه‌ته قۆناغی پڕچه‌كبوون".
ته‌ئكیدیشی كردووه‌ته‌وه كه كۆریای باكوور له رۆژی 21/4/2018ـه‌وه هه‌موو پرۆسه‌یه‌كی په‌یوه‌ست به تاقیكردنه‌وه‌ی ئه‌تۆمی و مووشه‌كی راده‌گرێت.
بڕیاره‌كه دۆناڵد تره‌مپ، سه‌رۆكی ویلایه‌ته یه‌كگرتووه‌كانی ئه‌مریكای خۆشحاڵ كرد و له تویته‌ره‌وه پێشوازی له‌و هه‌نگاوه كرد و نووسی "سه‌رۆكی كۆریای باكوور تاقیكردنه‌وه مووشه‌كی و ئه‌تۆمییه‌كانی راگرتووه‌و شوێنی تاقیكردنه‌وه‌كه‌ی داخستووه. ئه‌وه‌ش هه‌واڵێكی زۆر باشه له كۆریای باكووره‌وه بۆ جیهان و پێشكه‌وتنێكی گه‌وره‌یه و به‌ره‌و لوتكه‌كه ده‌ڕۆین. وه‌ك ئاماژه‌یه‌ك بۆ دیداری نێوان خۆی و كیم جۆنگ ئون.
جگه له‌وه‌یش، هه‌ر یه‌كه له ژاپۆن و كۆریای باشوور، به راگه‌یاندنه‌كه‌ی كۆریای باكوور خۆشحاڵ بوون و پێشوازییان له‌و هه‌نگاوه كردووه.
دۆسێی ئه‌تۆمی و تاقیكردنه‌وه‌ی مووشه‌كی و بالیستییه‌كانی كۆریای باكوور، ساڵانێكه بووه‌ته كێشه و مه‌ترسی له نیمچه دوورگه‌ی كۆری و تا ئاستی وه‌ڵامدانه‌وه‌ی سه‌ربازی له نێوان دراوسێكانی و ئه‌مریكا رۆیشت و ئاماده‌كاری سه‌ربازیش كرا. به‌ڵام ماوه‌یه‌كه كۆریای باكوور به‌ده‌نگ داواكارییه‌كانه‌وه چووه‌و له‌و بواره‌دا پێشكه‌وتنی پۆزه‌تیڤ روویداوه‌و چه‌ندین دیدار له‌نێوان به‌رپرسانی پیۆنگ یانگ و كۆریای باشوور و چین و ئه‌مریكا ئه‌نجامدراوه‌و تا ئه‌گه‌ری دیداری كیم جۆنگ ئون و دۆناڵد تره‌مپ هه‌نگاوه‌كان چوونه‌ته پێشه‌وه.