كوردستان 24 ناوه‌ڕۆكی نامه‌یه‌كی نێچیرڤان بارزانی بۆ عادل عه‌بدولمه‌هدی ئاشكرا ده‌كات
K24- هه‌ولێر:
كوردستان24 ناوه‌ڕۆكی نامه‌یه‌كی نێچیرڤان بارزانی بۆ سه‌رۆك وه‌زیرانی عێراق ئاشكرا ده‌كات، كه‌تیایدا داوای پێدانی ماف و ئیمتیازاته‌كانی كه‌سوكاری شه‌هیدان و ئه‌نفالكراوان و زیندانیانی سیاسی هه‌رێمی كوردستان ده‌كات، هاوشێوه‌ی شاره‌كانی دیكه‌ی عێراق، به گوێره‌ی زانیارییه‌كانیش ئه‌و پرسه ئێستا له چاوه‌ڕوانی رێككه‌وتنی سیاسی و په‌سه‌ندكردنی بودجه‌ی گشتی عێراقدایه.
ئه‌و زانیاریانه‌ی به ده‌ست كوردستان 24 گه‌یشتوون، ئاماژه به‌وه ده‌ده‌ن، كه حكوومه‌تی هه‌رێمی كوردستان و حكوومه‌تی عێراق له هه‌وڵی هاوتاكردن و دابینكردنی بودجه و موچه‌ی شه‌هیدان و ئه‌نفالكراوان و زیندانیانی سیاسی هه‌رێمی كوردستانن له‌گه‌ڵ شاره‌كانی دیكه‌ی عێراق.
له لێدوانێكی تایبه‌تیشدا بۆ كوردستان 24، به‌ڕه‌ڤان حه‌مدی، بریكاری وه‌زاره‌تی كاوباری شه‌هیدان و ئه‌نفالكراوان ناوه‌ڕۆكی نامه‌یه‌كی سه‌رۆكی حكوومه‌تی هه‌رێم بۆ سه‌رۆك وه‌زیرانی عێراق ئاشكرا ده‌كات، كه داوای پێدانی مافه‌كانی كه‌سوكاری شه‌هیدان و ئه‌نفالكراوان و زیندانیانی سیاسی له سه‌رۆك وه‌زیرانی عێراق كردووه.
به‌گوێره‌ی ئه‌و زانیاریانه‌ش كه ده‌ست كوردستان 24 كه‌وتوون، هه‌وڵدراوه له بودجه‌ی گشتی عێراقدا پشكی كه‌سوكاری شه‌هیدان، ئه‌نفالكراوان و زیندانیانی سیاسیی هه‌رێمی كوردستان دیاری بكرێت و مانگانه موچه‌كانیان هاوشێوه‌ی موچه‌ی شه‌هیدان و زیندانیانی سیاسی عێراقی لێ بكرێت.
له‌مباره‌شه‌وه كازم سه‌یادی، په‌رله‌مانتاری ده‌وڵه‌تی یاسا له ئه‌نجوومه‌نی نوێنه‌رانی عێراق ده‌ڵێت: "پێویسته سه‌رجه‌م شه‌هیدان و زیندانیانی سیاسی هه‌رێمی كوردستان و عێراق هه‌مان ماف و تایبه‌تمه‌ندیان هه‌بێت".
ئێستا پرسی بودجه و هاوتاكردنی مووچه‌ی كه‌س و كاری شه‌هیدان و ئه‌نفالكراوان و زیندانیانی سیاسی هه‌رێمی كوردستان به‌ستراوه‌ته‌وه به‌رێككه‌وتنی سیاسی و په‌سه‌ندكردنی بودجه‌ی گشتی عێراقه‌وه، بۆیه تا ئێستا هیچ بریارێك له‌وباره‌یه‌وه نه‌دراوه و له‌سه‌ر مێزی گفتوگۆكان ماوه‌ته‌وه.
H.B