میلیشیاکانی سەر بە تورکیا هاوشێوەی داعش هەڕەشەی سەربڕینی کورد دەکەن
K24 – هه‌ولێر:
چەند چەکدارێکی میلیشیاکانی سەر بە تورکیا لە سەرێ کانی هەڕەشەی سەربڕینی کورد دەکەن و یەکێکیان دەڵێت، بەم نزیکانە سەر بڕدراو دەبینن.
هەڕەشەی ئەم چەکدارە تووندڕەوانە لە کاتێکدایە، دوێنێ شەممە 19/10/2019، رەجەب تەیب ئەردۆغان، سەرۆک کۆماری تورکیا رایگەیاند: "سەری کوردەکان پان دەکەمەوە ئەگەر بە تەواوی لە ناوچەی ئارام نەکشێنەوە".
هەر لە سەرەتای هێرشی تورکیا بۆ سەر رۆژئاوای کوردستان، ئەم گروپە ئیسلامییە توندڕەوانە لە ژێر ناوی جیاواز دەستیان کرد بە شەهیدکردنی هاووڵاتیان و ویستیان ترس و دڵەڕاوکێ بڵاوبکەنەوە.
لە گرتە ڤیدیۆیەکدا کە موستەفا بالی، بەرپرسی راگەیاندنی هەسەدە، لە هەژماری خۆی لە تویتەر بڵاویکردووتەوە و ماڵپەڕی دەیلی مەیلی بەریتانیش ئاماژەی پێداوە، ئەو میلیشیایانە دەڵێن: "ئێمە هاتووین سەرتان بڕین، ئێوە کافر و لادەرن. بە پشتیوانی خوا ئێمە دێین بۆتان. سەرکەوتن بەس لەگەڵ خودایە لەگەڵ سەربڕین".
یەکێکی دیکەشیان هاوار دەکات و دەڵێت: "بەم نزیکانە سەری بڕدراو دەبینن".
پێشتریش ئەم میلیشیایانە، ڤیدیۆی گوللـەبارانکردنی چەند هاووڵاتییەکی مەدەنی سەرێ کانیان بڵاوکردبووە.
موستەفا بالی لەبارەی ئەو گرتە ڤیدیۆیە نووسیویەتی، بۆ هەموو ئەوانەی نیگەران بوون کە رەنگە داعش بگەڕێتەوە، داعش ئێستا گەڕاوەتەوە بۆ باکووری سووریا بە پاڵپشتی تورکیا.
Video of summary execution of unarmed Kurds by Turkish-backed militias somewhere on M4 highway. The same place where female Kurdish politician #HavrinKhalaf was murdered in cold blood by the same gunmen operating with Turkish army. pic.twitter.com/0reV2ZKry2
— Mustafa Bali (@mustefabali) October 19, 2019
H.J