توركیا گوندێكی سنووری زاخۆ بۆردوومان دەكات

K24 - زاخۆ

ئیسلام یوسف، پەیامنێری كوردستان24 لە زاخۆ رایگەیاند: "بەرەبەیانیی ئەمڕۆ، فڕۆكە جەنگییەكانی توركیا گوندی شەڕانشە-یان لە سنووری زاخۆ بۆردوومان كرد و زیانی ماددیی زۆر بەر گوندنشینان كەوتووە".

یەكێك لە گوندنشینان لەبارەی بۆردوومانكردنی گوندەكەیان بە كوردستان24ی گوت: "دوای كاتژمێر 5ی بەیانیی ئەمڕۆ بۆردوومانەكە دەستی پێ كرد و بۆمبێك لەبەردەم ماڵی كوڕەكەم تەقییەوە، خۆشبەختانە ھەموویان سەلامەتن، بەڵام زیانی زۆری بە خانوو و ئۆتۆمبێلەكان گەیاندووە".

گوتیشی: "راستە توركیا بە ھۆی بوونی گەریلاكانی پەكەكە ئەو سنوورانە بۆردوومان و تۆپباران دەكات، بەڵام پەكەكە لەناو گوند نین، تا ناو گوندەكەمان بۆردوومان بكەن".

ھ.م