په‌يامى بێژه‌رى شۆڕشى رۆژهه‌ڵاتى كوردستان بۆ فه‌رهاد سه‌نگاوى

داوا ده‌كات فه‌رهاد سه‌نگاوى په‌شيمان بێته‌وه‌

K24 – هه‌ولێر:

ئه‌حمه‌د شێربه‌گى بێژه‌رى ناسراوى ئێزگه‌ى ده‌نگى حزبى ديموكرات و شۆڕشى رۆژهه‌ڵاتى كوردستان، په‌يامێكى ڤيديۆيى ئاراسته‌ى فه‌رهاد سه‌نگاوى ئه‌ندامى په‌رله‌مانى كوردستان و يه‌كێك له‌ نه‌يارانى پرۆسه‌ى ريفراندۆمى سه‌ربه‌خۆيى كوردستان كردووه‌.

له‌ په‌يامه‌كه‌يدا، كه‌ له‌ لاپه‌ڕه‌ى خۆى له‌ تۆڕى كۆمه‌ڵايه‌تى فه‌يسبووك بڵاويكردووه‌ته‌وه‌، ئه‌حمه‌د شێربه‌گى رووده‌كاته‌ فه‌رهاد سه‌نگاوى و رۆژانى سه‌رده‌مى كارى بێژه‌رى له‌ راديۆى ده‌نگى گه‌لى كوردستانى سه‌ر به‌ يه‌كێتى نيشتيمانى كوردستانى بير ده‌هێنێته‌وه‌، كه‌ چۆن به‌ وتاره‌ ئاگرينه‌كانى داواى گيانبه‌ختكردن و شه‌هيدبوونى بۆ رزگارى كوردستان ده‌كرد و له‌ ئێستاشدا بووه‌ته‌ كاره‌كته‌رێكى سه‌رسه‌ختى دژايه‌تيكردنى سه‌ربه‌خۆيى كوردستان.

ئه‌حمه‌د شێربه‌گى ده‌ڵێت: كوا ئه‌و ده‌نگه‌ى جه‌ماوه‌رى بۆ راپه‌ڕين هانده‌دا، به‌ راستى تۆ هه‌ر فه‌رهاده‌كه‌ى شاخى، كوا ئه‌و ده‌نگه‌ى به‌ هه‌زارانت شه‌يداى كوردستان ده‌كرد، كوا ئه‌و ده‌نگه‌ى كه‌ ده‌يگوت به‌فريش گڕى گرت.. فه‌رهاد ده‌مێكه‌ تۆ ئه‌و ده‌نگه‌ نه‌ماوى كه‌ گيانى به‌رخودانت ده‌گه‌ڕانده‌وه‌ بۆ دارو به‌ردى كوردستان  ئه‌و ده‌نگه‌ى من ده‌مناسى ئه‌وه‌ نه‌بوو، كه‌ بانگه‌شه‌ بۆ قازانجى نه‌ياران و سه‌رمايه‌دارانى هه‌ژار كوژى له‌ خوا بێخه‌به‌ر بكات، كه‌ ته‌نيا و ته‌نيا پاره‌يان بۆ گرنگه‌.. ئێستا رۆژى تۆ بوو، جه‌ماوه‌ر هانبده‌يت كه‌ به‌ده‌نگيان كۆتايى به‌ كۆيله‌يى بێنن.. مه‌گه‌ر هه‌زاران پێشمه‌رگه‌ى ئه‌م كوردستانه‌ بۆ سه‌ربه‌خۆيى گيانيان نه‌به‌خشى كه‌ تۆ ناويانت ده‌خوێنده‌وه‌، مه‌گه‌ر تۆ به‌ڵێنت نه‌دابوو، ئاواتيان به‌ديبهێنى.. ئێستا چيت هه‌يه‌ به‌ هه‌ڵه‌بجه‌ى خنكاو و شه‌هيدانى رێى رزگارى بڵێى.. فه‌رهاد ئێستا ئه‌وه‌ى تۆ ده‌يكه‌يت داگيركه‌ريش هه‌ر ئه‌وه‌ ده‌كات.. هيچت له‌ پرسى كورد نه‌زانيوه‌ و تووشى داڕمانێكى گه‌وره‌ بوويت.. ده‌نگ نه‌دانت به‌ سه‌ربه‌خۆيى و ده‌نگدانه‌ به‌ كۆيله‌يى و ژێر ده‌سته‌يى هه‌تا هه‌تايى.

هه‌روه‌ها ده‌ڵێت: هه‌تا دره‌نگ نه‌بووه‌ بگه‌ڕێوه‌ به‌ره‌ى سه‌ربه‌خۆيى خوازان و ده‌نگت بۆ سه‌ربه‌خۆيى هه‌ڵبڕه‌. با مێژوو داستانى جوامێرى شاخت به‌ خه‌تێكى زێڕين بنووسێته‌وه‌.. مه‌به‌ به‌ ده‌نگى دوژمنانى سه‌ربه‌خۆيى..