هۆكاری چوونی هێزه‌كانى ئه‌مه‌ریكا بۆ كه‌ركوك ئاشكرا ده‌بێت
K24- هه‌ولێر:
به‌گوێره‌ی راپۆرتێكی رادیۆی ده‌نگی ئه‌مه‌ریكا، هاوپەیمانان هێزێکى تایبەتى ڕەوانەى بنکەى سەربازى کەیوه‌ن (K1) له کەرکووک کردووە و ئامانج لە ناردنى ئەو هێزە، ئامادەکارییە بۆ قۆناغى داهاتوو و رێگریكردنه لە دروستبونى بارگرژى لەسنوورى کەرکووک و قەزاى خورماتوى سه‌ر به‌پارێزگاى سەڵاحەدین.
وه‌ك راپۆرته‌كه ئاماژه‌ی پێكردووه "هێزەکانى ئەمەریکا و هاوپەیمانان ترسیان لەوە هەیە بارگرژییەکانى کەرکووک و خورماتوو تەشەنە بکەن و لەدەست دەربچن، بۆیە لەئێستاوە هێز لەسەربازگەى کەیوه‌ن کۆدەکەنەوە و خۆیان بۆ قۆناغى ئەگەرى سەرهەڵدانى بارگرژى ئامادەدەکەن".
ئەحمەد عەسکەرى ئەندامى ئەنجوومەنى پارێزگاى کەرکووک له لیستی برایه‌تی، بەدەنگى ئەمەریکاى راگەیاندووه "عێراق ئێمەى چەککردووە و هێزمان لەکەرکووک نەماوە، کەچى ئەوان چیان بوێت بەچەکەوە دەیکەن".
عه‌سكه‌ری گوتیشى: "هاتنى هێزەکانى هاوپەیمانان کە هێزێکى بێلایەنن، گرنگە بۆ هێورکردنەوەى دۆخى کەرکووک".
وه‌ك رادیۆی ده‌نگی ئه‌مه‌ریكا بڵاویكردووه‌ته‌وه، ئەو هێزەى رەوانەى سەربازگەى کەیوه‌ن کراوە، هێزێکى تایبەتى نەوعییە و پێش رۆیشتنى هێزەکەش بۆ ئەو سەربازگەیە، هاوپەیمانان بەئامادەبوونى ئەمەریکى و بەریتانى و ئەڵمانییەکان، تاووتوێى گرنگى ناردنى ئەو هێزە و رێگرتنیان لەدروستبوونى بارگرژى کردووە.
سه‌باره‌ت به پێکهاتەى هێزەکە، عەسکەرى بۆ ئه‌و رادیۆیه ده‌ڵێت: "ئەو هێزەى هاتووەتە کەیوه‌ن هێزى جیاوازترن لەو هێزەى پێشوو، پێده‌چێت هێزێكی شه‌ڕكه‌ر بێت".
زانیارییەکان ئاماژە بەوەدەکەن هاوپەیمانان ترسیان لە دروستبوونى بارگرژى و شەڕ لە کەرکووک و خورماتوو هەیە، بەتایبەت ناوبەناو گرژى روودەدات و لایەنى کوردیش لەو ناوچانە هەست بەپەراوێزخستن دەکات، عێراقیش هێز و چەکى پێویستى بۆ ئەو ناوچانە ناردووە، بۆیە هاوپەیمانان دەیانەوێت بۆ حاڵەتى پێویست هێزیان لەو ناوچانە ئامادەبێت.
راپۆرته‌كه ده‌شڵێت: رایان دیلن، گوتەبێژى هاوپەیمانێتى نێودەوڵەتی لەبەغداوە، رایگەیاندووە رۆیشتنى هێزەکانى هاوپەیمانان بۆ سەربازگەى کەیوه‌ن لەکەرکووک، بەهەماهەنگى لەگەڵ هێزە عێراقییەکان بووه و جه‌ختیشی كردووه‌ته‌وه "دووباره هێزەکانمان لەسەرانسەرى عێراق جێگیر دەکەین".
راپۆرته‌كه‌ی ده‌نگی ئه‌مه‌ریكا روونیشی كردووه‌ته‌وه، "ناردنى چەک و تەقەمەنى بۆ دەوروبەرى کەرکووک لەلایەن وڵاتێکى ئیقلیمییەوە لەلایەن هاوپەیمانانەوە بەوە لێکدراوەتەوە، کە ئامادەکارى بۆ ئاڵۆزکردنى کەرکووک و دەوروبەرى لەئارادایە بۆیە هاوپەیمانانیش ئامادەکارى دەکەن بۆ رێگرتن لە سەرهەڵدانى هه‌ر گرژییه‌ك".
له‌لایه‌كی دیكه‌وه، ئه‌مڕۆ پێنج شه‌ممه 30/11/2017 فه‌رمانده‌یی ئۆپراسیۆنی هاوبه‌شی عێراق له به‌یاننامه‌یه‌كدا رایگه‌یاندووه "هه‌ندێك راگه‌یاندن له سه‌رچاوه‌ی هه‌رێمی كوردستانه‌وه باسی جووڵه‌ی ھێزه‌كانی ئه‌مریكایان له كه‌ركووك كردووه، به‌ڵام ئه‌و هه‌واڵانه به‌ته‌واوی ره‌تده‌كه‌ینه‌وه".
هه‌روه‌ها ئاماژه‌یان به‌وه‌كردووه "هیچ هێزێكی هاوپه‌یمانان له كه‌ركووك و ناوچه‌كانی دیكه‌ی عێراق زیاد نه‌كراوه‌و كاری هیچ هێزێكی بیانیش نییه كۆنترۆڵی ناوچه‌كانی عێراق بگرێته ئه‌ستۆی خۆی و له رووی ژماره‌شه‌وه توانای ئه‌وتۆیان نییه تا ئه‌و كاره بكه‌ن".
ئۆپراسیۆنی هاوبه‌ش ده‌ڵێت "ئه‌ركی ھێزه‌كانی هاوپه‌یمانی نێوده‌وڵه‌تی دیاریكراوه‌و ته‌نها مه‌شق و راهێنان و راوێژكاریی و پاڵپشتی لۆجییستییه".