"ده‌نگ به‌ ده‌میرتاش و ئازادیی بده‌ن"

هاوژینه‌كه‌ی ده‌میرتاش: به‌خێرایی بچنه‌ سه‌ر سندووقه‌كانی ده‌نگدان
kurdistan24.net

K24 - هه‌ولێر:

ئه‌مڕۆ یه‌كشه‌ممه‌ 24/6/2018 هاوژینه‌كه‌ی سه‌ڵاحه‌ددین ده‌میرتاش، كاندیدی سه‌رۆككۆماریی توركیا له‌ شاری دیاربه‌كری باكووری كوردستان ده‌نگیدا و داوای كرد هاووڵاتیان بچنه‌ سه‌ر سندووقه‌كانی ده‌نگدان و به‌شداریی هه‌ڵبژاردن بكه‌ن.

باشاك ده‌میرتاش له‌ پاش ده‌نگدان قسه‌ی بۆ میدیاكان كرد و گووتی: "به‌خێرایی بچنه‌ ناوه‌نده‌كانی ده‌نگدان و ده‌نگ بۆ ده‌میرتاش و ئازادی بده‌ن".

له‌ كاتژمێر 8:00 سه‌رله‌به‌یانی ئه‌مڕۆوه‌ ده‌نگدان بۆ هه‌ڵبژاردنی سه‌رۆككۆمار و په‌رله‌مانی نوێی توركیا ده‌ستیپێكردووه‌و زیاتر له‌ 56 ملیۆن هاووڵاتی توركیا مافی ده‌نگدانیان هه‌یه‌.

سه‌ڵاحه‌ددین ده‌میرتاش یه‌كێكه‌ له‌ كاندیده‌كانی سه‌رۆكایه‌تی كۆماری توركیا و ماوه‌ی زیاتر له‌ ساڵێكه‌ له‌ زینداندایه‌و له‌ دوا په‌یامی ده‌نگیدا به‌بۆنه‌ی ده‌ستپێكردنی هه‌ڵبژاردنیش گووتی: "ئه‌گه‌ر هه‌ده‌په‌ نه‌گاته‌ په‌رله‌مان، هه‌موو توركیا زیانی پێده‌گات، بۆیه‌ پاڵپشتیكردنی هه‌ده‌په‌ واتای پاڵپشتیكردنی دیموكراسییه‌ته‌".