مۆساد كارگه‌یه‌كی مووشه‌كی ئێرانی له عێراق ئاشكراكرد
K24 - هه‌ولێر:
ئه‌مڕۆ سێشه‌ممه 23/10/2018ـی رۆژنامه‌ی یسرائیل هیوم، له راپۆرتێكدا ئاشكرایكردووه، ده‌زگای هه‌واڵگری ئیسرائیل "مۆساد" ته‌ئكیدیان كردووه‌ته‌وه كه عێراق ده‌كه‌وێته هێڵی رووبه‌ڕووبووه‌نه‌وه‌ی نێوان ئیسرائیل و ئێران".
به‌گوێره‌ی زانیارییه‌كانی رۆژنامه‌كه، مۆساد ئه‌و زانیاریانه‌ی ده‌ستكه‌وتووه كه ئێران كارگه‌ی درووستكردنی مووشه‌كی بالیستی له عێراقیش درووست ده‌كات نه‌ك ته‌نها سووریا و لوبنان.
له راپۆرته‌كه‌دا هاتووه "ئێران مووشه‌كی راده‌ستی هێزه شیعییه‌كانی عێراق كردووه و هاوكاریكردوون بۆ ئه‌وه‌ی له‌ناو خاكی عێراقدا كارگه‌ی درووستكردنی مووشه‌ك دابمه‌زرێنن".
هه‌روه‌ه ده‌ڵێت "ئێران هه‌وڵه‌كانی بۆ دامه‌زراندنی كارگه‌ی درووستكردنی مووشه‌ك هاوشێوه‌ی لوبنان، له سووریا دوو به‌رامبه‌ر كردووه".