ههڤاڵ ئهبوبهكر به "نامهیهكی خێرا" هۆشداری له دۆخی سلێمانی دهدات
K24 - ههولێر:
ههڤاڵ ئهبوبهكر، پارێزگاری سلێمانی، له "نامهیهكی" خێرا" كه ئاراستهی كۆمیسیۆنی كۆمسیۆنی باڵای سهربهخۆی ههڵبژاردنهكانی عێراق كردووه، هۆشداری له دۆخی پارێزگای سلێمانی دهدات و رایدهگهنێت بههۆی كهمتهرخهمی چهند كهسێكی ناو كۆمیسیۆن "دۆخێكی مهترسیداری نهخوازراو" هاتووهته ئارا.
له نامهكهدا كه دهست كوردستان 24 كهوتووه، پارێزگاری سلێمانی، رووداوی ههڵكوتانه سهر بارهگای گۆڕان و تهقهكردنهكهی ههفتهی رابردوو له گردی زهرگهته بهبیر دههێنێتهوه و دهڵێت: "گۆڕینی دهنگی ڕهوای خهڵك و قهبارهی قهوارهكان و نوێنهرایهتیی كاندیداكان، گۆڕینی شادیی هاووڵاتیان بهشین، سهركهوتن به كهوتن، ئاشتیی به شهڕ، ڕاستیی به ساخته، تاوانگهلێكی گهورهن، ڕێ بۆ دوبارهبونهوهی هاوشێوهی پهلاماردانه ناڕهواكان بۆ سهر بارهگای سهرهكیی بزوتنهوهی گۆڕان و لایهنه ناڕازییهكانی تر، خۆشدهكهن".
ههڤاڵ ئهبوبهكر داوای لێكۆڵینهوهی خێراو ڕوون و یاساییانه له ئۆفیسی سلێمانی كۆمسیۆنی باڵای سهربهخۆی ههڵبژاردنهكانی عێراق و له ئهنجامهكانی دهنگدان دهكات و دهڵێت: "داوا دهكهین سكاڵای لایهنهكان بههێند وهربگیرێن، به پێچهوانهوه مانایهك بۆ دهنگی ڕهوای خهڵك و بۆ پرۆسهی ههڵبژاردن و بۆ سیستمی دیموكراسیی و بۆ سهروهریی یاسا نامێنێتهوهو ئهم ناوچهیه ڕوبهڕوی قهیرانگهلێكی سهخت و دژوارو ئاڵۆزتر دهبێتهوه".
دهقی نامهكهی ههڤاڵ ئهبوبهكر:
"نامهیهكی خێرا بۆ؛
كۆمسیۆنی باڵای سهربهخۆی ههڵبژاردنهكانی عێراق
بهناوی خودای مهزنی میهرهبان
- هاووڵاتیانی كوردستان و عێراق..
- نوێنهرایهتیی ڕێكخراوی نهتهوهیهكگرتووهكان له عێراق و ههرێمی كوردستاندا..
- ڕێكخراوه ناوخۆیی و نێودهوڵهتییهكان..
- سهرجهم باڵیۆزخانهو كونسڵخانهكانی وڵاتان له عێراق و ههرێمی كوردستاندا..
ئێمه له پارێزگای سلێمانی، بێلایهنانهو یاساییانهو ئیدارییانهو بهرپرسانهو دهوڵهتییانه، چاوهڕوانی بهڵێن و لێدوانه ڕهسمییهكانتان بووین دهرههق بهو ههموو گومان و كهمتهرخهمیی و ساختهكارییانهی له ئهنجامی دهنگی دهنگدهرانی ههڵبژاردنهكانی ڕۆژی 12/5/2018كرابوون، بهڵام بهنیگهرانییهكی زۆرهوه سوربوونی خۆتان لهسهر ڕاگهیاندنی ئهنجامهبهراییهكان و گوێنهدان به نووسراوه ڕهسمیی و تانهو سكاڵاكان دووپاتكردهوه، له بری ڕهواندنهوهی گومانهكان، پانتایی گومانهكانتان زیاتركرد.
لهم بارهیهوه بهڕونیی و ڕاشكاویی پێتان ڕادهگهیهنین، كه ئهگهر ئهركی یاسایی بهڕێوهبردنی پرۆسهی ههڵبژاردن له ئهستۆی ئێوهدا بێت، ئهوا ئهركی پاراستنی هاووڵاتیان و ئاسایش و ئارامیی و ژیان و شكۆو ماف و دهنگ و زهمینهی بهشداریكردنیان له ئهستۆی ئێمهدایه، لهم ڕوانگهیهوه كهمتهرخهمیی و خهمساردیی و بێباكیی ههندێك له كهسانی ناو كۆمسیۆنی باڵای سهربهخۆی ههڵبژاردنهكانی عیراق و ئۆفیسهكانی كۆمسیۆن لهههندێك شوێن، دۆخێكی مهترسیداریی نهخوازراویان هێناوهتهكایهوه.
بۆ ڕهواندنهوهی ههموو ئهمانه؛ داوای لێكۆڵینهوهی خێراو ڕوون و یاساییانه له ئۆفیسی سلێمانی كۆمسیۆنی باڵای سهربهخۆی ههڵبژاردنهكانی عێراق و له ئهنجامهكانی دهنگدان دهكهین و داوا دهكهین سكاڵای لایهنهكان بههێند وهربگیرێن، به پێچهوانهوه مانایهك بۆ دهنگی ڕهوای خهڵك و بۆ پرۆسهی ههڵبژاردن و بۆ سیستمی دیموكراسیی و بۆ سهروهریی یاسا نامێنێتهوهو ئهم ناوچهیه ڕوبهڕوی قهیرانگهلێكی سهخت و دژوارو ئاڵۆزتر دهبێتهوه، متمانهی خهڵك به دامهزراوه دهستوریی و دهوڵهتییهكان نامێنێت، زهمینهی بهریهككهوتنی سیاسیی و كۆمهڵایهتیی دههێنێتهكایهوه.
گۆڕینی دهنگی ڕهوای خهڵك و قهبارهی قهوارهكان و نوێنهرایهتیی كاندیداكان، گۆڕینی شادیی هاووڵاتیان بهشین، سهركهوتن به كهوتن، ئاشتیی به شهڕ، ڕاستیی به ساخته، تاوانگهلێكی گهورهن، ڕێ بۆ دوبارهبونهوهی هاوشێوهی پهلاماردانه ناڕهواكان بۆ سهر بارهگای سهرهكیی بزوتنهوهی گۆڕان و لایهنه ناڕازییهكانی تر، خۆشدهكهن.
بۆیه پێویسته كۆمسیۆنی باڵای سهربهخۆی ههڵبژاردنهكانی عێراق؛ بهخێرایی كۆتایی به گهمهی دهنگهكان بهێنێت، یان بهدهست ئهژماریانبكاتهوه، یان كۆپیی وێنهی دهنگی دهنگدهران بداته قهواره بهشداربووهكان.
ههر لێكهوتهیهكی خراپ و نهخوازراو لهم پرۆسهیه بكهوێتهوه، بهر لهههر لایهنێكی گلاو لهم لادانانه، كۆمسیۆنی باڵای سهربهخۆی ههڵبژاردنهكانی عێراق بهرپرسیاره.
لهگهڵ ڕێزدا..
د. ههڤاڵ ئهبوبهكر
پارێزگاری سلێمانی
17/5/2018"