مه‌لا به‌ختیار چه‌ند نهێنییه‌كی به‌رهه‌م ساڵح ئاشكرا ده‌كات

مه‌لا به‌ختیار: به‌رهه‌م ساڵح داوای ڤێلا و پاره‌ی كردووه‌

K24 - هه‌ولێر:

مه‌لا به‌ختیار، هێرشی توند ده‌كاته‌ سه‌ر به‌رهه‌م ساڵح، كه‌ پێشتر جێگری دووه‌می سكرتێری گشتی حزبه‌كه‌ی و ئێستاش سه‌رۆكی هاوپه‌یمانی بۆ دیموكراسی و دادپه‌روه‌رییه‌ و ده‌ڵێت: هه‌وڵیداوه‌ كورسی سه‌رۆكایه‌تی كۆمار له‌ژێر مام جه‌لا ده‌ربھێنێ و ئه‌و ماوه‌یه‌ی سه‌رۆكی حكومه‌تی هه‌رێمیش بووه‌ كاری بۆ ئه‌وه‌كردووه‌ حكومه‌ت به‌ قه‌رزداری راده‌ستی نێچیرڤان و قوباد بكاته‌وه‌.

هه‌روه‌ها ده‌ڵێت: " به‌رهه‌م ساڵح هه‌میشه‌ به‌دوای پله‌ و پۆست و پاره‌وه‌ بووه‌ و ته‌نانه‌ت ویستوویه‌تی لەدەرەوەی وڵات بچێتە كۆسۆڤۆ، یاریدەدەری حاكمی كۆسۆڤۆ بێت، بە مانگانەی (50 هەزار دۆلار)".

مه‌لا به‌ختیار ئاماژه‌ی به‌وه‌كردووه‌ كه‌ مام جەلال، د.لەتیف رەشیدی ناردووه‌ته‌ لای به‌رهه‌م ساڵح و پێیگوتووه‌: تۆ ئەندامی سەركردایەتیت، چۆن كاری وا دەكەیت؟ مام دەتكاتە نوێنەری یەكێتی لەئەمریكا. لەوەڵامدا به‌رهه‌م ساڵح گوتوویه‌تی: نابێ‌ لە (50 هەزار دۆلار) كەمترم بداتێ‌‌و دەشبێ‌ ڤێلایەكیشم بۆ بكڕێ"‌. واتا: بەشەرتی موچەی بەرزو ڤێلای چەند نهۆمی، رازی بووه‌ ببیتە نوێنەری یەكێتی لەئەمریكا و ئێستاش ڤێلاكە بەناوی خۆیه‌وه‌یه‌تی. وه‌ك ئه‌وه‌ی مه‌لا به‌ختیار ده‌یڵێت.

ئه‌و نوسینه‌ی مه‌لا به‌ختیار كه‌ له‌ ژێر ناوی "چه‌واشه‌كارییه‌كانی د. به‌رهه‌م له‌ هه‌ڵبژاردندا" له‌ پێگه‌ی ئه‌لیكترۆنی چاودیر بڵاوكراوه‌ته‌وه‌، له‌ وه‌ڵامی ره‌خنه‌ تونده‌كانی به‌رهه‌م ساڵحه‌ كه‌ (18/3/2018) لەكۆڕێكی هەولێردا، تانەو تەشەری له‌ مه‌لا به‌ختیار داوه‌و، كه‌ گوتوویه‌تی: "دەستاودەستكردنی دەسەڵات قبوڵ ناكەین".

مه‌لا به‌ختیار به‌توندی ره‌خنه‌ له‌ به‌رهه‌م ساڵح ده‌گرێت و له‌ سه‌ره‌تای نووسینه‌كه‌یدا ده‌ڵێت: " باش گوێم گرت، كە دوای دوو خول لەسەرۆكایەتی حكومەتی هەرێم‌و دوو خولیش لە جێگریی سەرۆكی حكومەتی بەغداد، ئەمە جگە لەوەی سێ‌ جار لە سێ كۆنگرەی یەكێتیدا، بەتەسكیە دەكرایە سەركردایەتی‌و جێگری سكرتێری گشتی؛ هەروا دوای جیابونەوەی لەیەكێتی لەكاتێكدا مام جەلال لەسەرەمەرگدا بوو، كەوتنە دژایەتی یەكێتی، لە(18/3/2018) لەكۆڕێكی هەولێردا، تانەو تەشەرمان لێدەدات، لەبەرئەوەی بەرگریمان لەیەكێتی كردووە، گوایە دەستاودەستكردنی دەسەڵات قبوڵ ناكەین. بۆئەوەی بەرێزی دڵنیابێ‌، بەدڵنیاییەوە ئەو بۆچونەمان هەبووە، لێرەش دەڵێم:

له‌ درێژه‌ی نووسینه‌كه‌یدا مه‌لا به‌ختیار ئاماژه‌ به‌وه‌ ده‌كات "یەكێتی یەك كورسیش بهێنێ‌، هەر یەكێتییە. دیقەت بدرێ‌، نەمانوتووە دەسەڵات تەسلیم ناكەین. وتومانە، رێژەشمان دابەزێ‌، هەر یەكێتین. ئێستا دەپاتیشی دەكەمەوە، رێژە بەرزبێتەوە یان دابەزێ‌، هەر یەكێتین. خۆ یەكێتی نین بەشەرتی سەپاندنی دەسەڵات.. ئەی ئەوە نییە لەپارێزگاكانی هەڵەبجەو سلێمانی، دەستاودەستمان كردووە بەدەسەڵات؟ ئەی نابینن كە ئێستاش پارێزگاری سلێمانی، گۆڕانە".

مه‌لا به‌ختیار به‌وه‌شه‌وه‌ ناوه‌ستێ و ئاماژه‌ به‌ ناڕه‌زایه‌تییه‌كانی 17ـی شوبات ده‌كات و ده‌ڵێت: "ئەوە من نیم، خۆپیشاندانی 17/ی شوبات دژم بەرپاكرابێ‌. ئەوە حكومەتەكەی جەنابت بوو، كە دەستەواژەی گەندەڵی خستە ناو ویژدانی رای گشتی.. بۆیە، گۆڕان توانی بەئاسانی خۆپیشاندان بخرۆشێنێ‌. هەر ئەوكاتەی جەنابیشت سەرۆكی لیستی یەكێتی بوی، بۆ هەڵبژاردن، لەبەرئەوەی متمانەت لاواز بوبوو، رێژەی دەنگەكانی یەكێتی دابەزی!".

هه‌روه‌ها نوسیوویه‌تی "خۆ من سەرۆكی حكومەت نەبووم، لەبەر دەركی سەراو لەشەقامەكاندا، تەقە لەخۆپیشاندەران دەكرا. خۆشت دەزانیت، هەڵوێستی من جیاواز بوو ئەوكاتە".

مه‌لا به‌ختیار به‌ به‌رهه‌م ساڵح ده‌ڵێ: "كە لە سەرۆكی حكومەتی هەرێم لابرای، لەناخی خۆتدا بڕیاری جیابونەوەتدا. هەربۆیە، لە بوونی (مام جەلال)یشدا.. (7) دانە مانگ نەهاتیتە كۆبونەوەكانی مەكتەبی سیاسی. ئەوسا تێتگەیشتبووم ئاڕاستەی جیابونەوەت هەیە. بیرتە، (3) ساڵ لەمەوبەر، لەماڵی كاك كۆسرەتدا، بەبەرچاوی ئەندامانی مەكتەبی سیاسی پێمووتی: تۆ لەیەكێتی جیادەبیتەوە، پێتناخۆشبوو، بەڵام من دڵنیا بووم لەبۆچونەكەی خۆوم. ئەوەتا بۆچونەكەت هێنایەدی!".

مه‌لا به‌ختیار باسی پرسی سه‌رۆكایه‌تی كۆماری عێراق ده‌كات و ده‌ڵێت: "كە لەمەكتەبی سیاسیش پێت نەكرا، بڕیاری زۆرینە وەربگریت بۆ سەرۆكی كۆمار، ویژدانت هەبێ‌، بۆئەوەی كێشەكان ئەوسا نەتەقێتەوە، بەندە پێشنیازم كرد، لەناو فراكسیۆنە كوردستانیەكان، هەڵبژاردنی ئازاد لەناو كاندیدەكاندا بكرێ‌، جەنابت زۆرت پێخۆش بوو. چونكە باوەڕت وا بوو، زۆرینەی دەنگەكان دەبەیتەوە. بەڵام كە بەرێز سەرۆك كۆمار لێیبردیتەوە، تەحەمولی ئەنجامەكەیت نەكردو ئیتر، ژێربەژێر كەوتیتە جێبەجێكردنی نەخشەی جیابوونەوە لەیەكێتی، كە دەمێك بوو لەهزری خۆتدا بڕیارت لێدابوو".

مه‌لا به‌ختیار درێژه‌ به‌ ره‌خنه‌كانی و هه‌ڵدانه‌وه‌ی لاپه‌ڕه‌كانی پێشوو ده‌دات و به‌ به‌رهه‌م ساڵح ده‌ڵێت: "تەحەمولی دوو بڕیارت نەكرد و هەڵچووی؛ بڕیاری یەكەم: كە لەسەرۆكی حكومەتی هەرێم لابرایت مام لایبردیت، خۆشت باش دەزانی بۆچی لایبردیت، من دژی لابردنیشت بووم، بەڵام زانیاریەكانی لای مام، لەسەرت، كە چیت كردووە دژی مام لای سونەكان، لای سعودیەكان‌و لای دەوڵەتانی تر، بۆئەوەی لەخولی دووەمدا مام نەكرێتەوە سەرۆك كۆمار، ئەوەندە زۆر بوون، تازە، بەقسەی من‌و ئەو هەڤاڵانەی وەكو من بیریان دەكردەوە، كە لەسەرۆكایەتی حكومەتی هەرێم بمێنیتەوە، تازە مام وای ناسیبوویت، بەقسەی ئێمەمانان، پاشگەز نەدەبووەوە".

بڕیاری دووەمیشت: كە هەڵبژاردنی ناو فراكسیۆنە كوردستانیەكان دۆڕابووی، وتبووت: خۆم دەزانم چی لە یەكێتی‌و لەماڵی مام جەلالیش دەكەم.. هەر واشت كردووە. لەلایەكەوە، هەتا لە حكومەت بووی، پارەی پاشەكەوتكراوی هاوڵاتی‌و كۆمپانیاكانت سەرفكرد، هەتا لەژێر باری قەرزێكی بێڕادە حكومەت بدەیتەوە بە نێچیرڤان‌و قوباد".

هه‌روه‌ها ده‌ڵێت، لەناو یەكێتیش، تەنها لەبەر مەزنخوازێتی خۆت، جیابونەوەت سەپاندو لەبەغداش بەردەوام خەریكی ئەوەیت، كێشەكانی هەرێم‌و بەغداد، چارەسەر نەكرێ‌. بەڵێ‌ جەناب!

مه‌لا به‌ختیار چه‌ند خاڵێك بیری به‌رهه‌م ساڵح دێنێته‌وه‌و نوسیوویه‌تی:-

-كە سەرۆكی حكومەت بوی، خەڵك لێت راپەڕی.

-كە مام جەلال لای بردیت، بەپیلانی حكومەتی بنكەفراوان‌و بەتاڵكردنی بانكەكان،  حوكمڕانیت لە كابینەی دوای خۆت دوچاری قەیرانی سیاسی كرد.

-كە حكومەت دوچاری قەیران هات، دەستت هەبوو لە خۆپیشاندانەكان، هەتاڕادەی توندوتیژی دژی بارەگاكانیش.. بیرتە پار بەمەرامی دروستكردنی حكومەتی رزگاری، دەتویست بچیتە ناو خۆپیشاندانەكانی مامۆستایان‌و داوای روخاندنی حكومەت بكەیت. بەڵام مامۆستایانی ناڕازیی، لە فیكەی هەموتان تێگەیشتن‌و خۆیان لەهەمووتان دورخستەوە.

-ئەی كە خۆپیشاندانەكانی پایزی پاریش رویدا، خۆ بیرتە دروشمی حكومەتی رزگاری نیشتمانیت بەرزكردەوە، ئەمریكاو دەوڵەتانی دۆست، وەڵامیان دانەوە كە تەنهاوتەنها، لەگەڵ حكومەتی نێچیرڤان‌و قوباد مامەڵەدەكەن‌و بەس.

-كە ئەم رێگایەت لێگیرا، بەهەڵپەهەڵپ، ئیئتیلافی سێقۆڵیت لەگەڵ گۆڕان‌و كۆمەڵ دروستكردو، بەهەڵەداوانیش، چویتە بەغداد بۆ تۆماركردنی هاوپەیمانیەتە نوێكەت بەناوی (الوگن) بەمەش بەرەسمی یەكڕیزیی هێزە كوردستانیەكانت لێكترازان. حكومەتی عێراق‌و شیعەكانیشت وا لێكرد، حكومەتی مەركەزی بسەپێنن‌و قسە لە زۆرینەو كەمینە بۆ حوكمڕانی بكەن لەعێراقدا. بەمەش فەلسەفەی مام جەلالت لەعێراقیشدا تێكدا، كە عێراق بە سازانی نیشتمانی حوكم بكرێ‌.

له‌ درێژه‌ی نووسینه‌كه‌یدا ده‌ڵێت "ناتوانی پەرێزت لەحكومەتەكانی كوردستان بەپاكیی پیشان بدەیت. ناتوانی بیسەلمێنی ئەستۆ پاكیت لەكاتی حوكمڕانیدا. ناتوانی خۆت لە مانۆڕەكانت لەناو هێزە سیاسیەكانی بەغداد، بێبەری بكەیت. مالیكی بەرۆشنیی‌و بەزمانی خۆی وتی: بەرهەم ساڵح داوای لێكردوم، بۆ كۆنترۆڵكردنی نەوتی كەركوك، هێز بەكاربهێنم. ئەمە كەی؟".

هه‌روه‌ها نوسیوویه‌تی، ئەوكاتەی جەنابت نوێنەری كوردو یەكێتی‌و مام جەلال بووی، لەحكومەتی عێراق‌و جێگری سەرۆك وەزیران بووی. هیچ هۆیەك نییە مالیكی بوختانی وات بۆ هەڵبەستێ‌، گەر دڵنیا نەبووبێ‌ لەوەی ئەو قسانەت لا كردبێ‌. بەدڵنیاییەوە، لەپێناوی خۆتدا، هەركە لەئەمریكاوە (2004) بەمەرجی سەرۆك وەزیرانی ئیدارەی سلێمانی گەڕاویتەوە، هەموو شتێكت كردووە. درێغیت بۆ مەرامەكانت‌و پیلانەكانت‌و بەڵێنە بێبناغەكانت، نەكردووە".