گرووپێكی 18 كه‌سى كه‌ كوردیشی تێدایه‌ به‌ تۆمه‌تی ده‌ستدرێژی سێكسی بۆ سه‌ر ژنان دادگایی ده‌كرێن

گرووپه‌كه‌ عێراقی، كورد، پاكستانی، ئێرانی، تورك، ئه‌لبانی و كه‌سانی رۆژهه‌ڵاتی ئه‌وروپاشی تێدایه‌

K24 - هه‌ولێر:

نوێنه‌رانی داواكاری گشتی به‌ریتانیا، ئه‌مڕۆ پێنج شه‌ممه‌ رایانگه‌یاند، گرووپێكی 18 كه‌سی، به‌ تۆمه‌تی به‌كارهێنانی كچان و ده‌ستدرێژیكردنه‌ سه‌ر ژنان, له‌ باكووری ئینگلته‌را دادگایی ده‌كرێن.

به‌ گوێره‌ی دادگای به‌ریتانیا، تا ئێستا 108 كچ بوونه‌ته‌ قوربانی ده‌ستی ئه‌و گرووپه‌, گرووپه‌كه‌ش عه‌ره‌ب، تورك، فارس، كورد، ئه‌لبانی و به‌نگلادیشی تێدایه‌.

ئه‌ندامانی ئه‌و گرووپه‌، ده‌ستدرێژی سێكسییان كردووه‌ته‌ سه‌ر كچه‌كان، دوای ئه‌وه‌ی مادده‌ی هۆشبه‌ریان داونه‌تێ، یاخود له‌ رێگه‌ی توندوتیژی و لێدانه‌وه‌ له‌ ئاهه‌نگه‌ تایبه‌ته‌كان ناچارییان كردوون ئه‌و كاره‌ بكه‌ن، به‌ گوێره‌ی قوربانییه‌كان، هه‌ندێكجار مادده‌ی ئه‌لكهولی و هۆشبه‌ریشیان دراوه‌ته‌وه‌.

نوێنه‌ری داواكاری گشتی و ستیڤ ئاشمان، به‌ڕێوه‌به‌ری پۆلیس
نوێنه‌ری داواكاری گشتی و ستیڤ ئاشمان، به‌ڕێوه‌به‌ری پۆلیس

وه‌ك له‌ لێكۆڵینه‌وه‌كان ده‌ركه‌وتووه‌، به‌شێك له‌و كچانه‌ به‌ شێوه‌یه‌ك مه‌ست و سه‌رگه‌رمكراون و ئه‌لكهولیان دراوه‌تێ، تا ئه‌و كاته‌ی له‌ هۆش خۆیان چوونه‌، دواتر ده‌ستدرێژی سێكسییان كراوه‌ته‌ سه‌ر.

زۆربه‌ی ئه‌وانه‌ی تۆمه‌ته‌كه‌یان به‌سه‌ردا ساغبووه‌ته‌ ئاسیایین و ته‌مه‌نییان له‌نێوان 30-40 ساڵیدایه‌، به‌ گوێره‌ی زانياريیه‌كانیش، حكوومه‌تی به‌ریتانیا نه‌یتوانیوه‌ ده‌ستێوه‌ردان له‌ ورده‌كارییه‌كانی ئه‌و كه‌یسه‌ بكات بۆ ئه‌وه‌ی به‌ ره‌گه‌زپه‌رستی تۆمه‌تبار نه‌كرێت.

ستیڤ ئاشمان، به‌ڕێوه‌به‌ری پۆلیسی نۆرسمبریا، گوتی: "كه‌یسه‌كه‌ هیچ په‌یوه‌ندییه‌كی به‌ سیاسه‌ته‌وه‌ نییه‌، ئه‌وانه‌ تاوانبارن، هیچ دوودڵیش نه‌بووینه‌ له‌ به‌كارهێنانی هه‌ر رێگایه‌كی به‌رده‌ست بۆ ده‌ستگیركردنیان‌".

نوێنه‌ری داواكاری گشتی رایگه‌یاند، ئه‌و گرووپه‌ 17 پیاون له‌گه‌ڵ ژنێك، زیاتر كچان و ژنانی سپی پێست كراونه‌ته‌ ئامانج و زۆربه‌ی قوربانییان ته‌مه‌نیان له‌نێوان 15-20 ساڵیدایه‌ و دانیشتووی شاری نیوكاسلی باكووری رۆژئاوای ئینگلته‌ران و تاوانه‌كانیش له‌ نێوان ساڵانی 2010 و 2014 ئه‌نجامدراون.

ژماره‌یه‌ك تاوانباری دیكه‌ی هه‌مان كه‌یس، كه‌ هه‌ندێكیان له‌ ده‌ره‌وه‌ی گرووپه‌كه‌ن
ژماره‌یه‌ك تاوانباری دیكه‌ی هه‌مان كه‌یس، كه‌ هه‌ندێكیان له‌ ده‌ره‌وه‌ی گرووپه‌كه‌ن

دواى چوارجار به‌ڕێوه‌چوونی دانیشتنی دادگا، رۆژی سێشه‌ممه‌ دادگا بڕیاری زیندانیكردنی بۆ سێ كه‌س له‌ ئه‌ندامانی ئه‌و گرووپه‌ ده‌ركرد و ئه‌وانی دیكه‌ش چاوه‌ڕوانی بڕیاری دادگان.

به‌ڕێوه‌به‌ری پۆلیس راشیگه‌یاند، لێكۆڵینه‌وه‌یه‌كی فراوان له‌ باره‌ی ده‌ستدرێژی سێكسی له‌و ناوچه‌یه‌ ده‌ستیپێكردووه‌ و 461 كه‌س به‌و تۆمه‌ته‌ لێكۆڵینه‌وه‌یان له‌گه‌ڵدا كراوه‌، له‌كۆی ئه‌و ژماره‌یه‌ش 93یان تۆمه‌تیان ئاراسته‌كراوه‌.

هه‌روه‌ها گوتی: "زۆربه‌ی زۆری تاوانباران سپی پێست نین، گرووپێكی هه‌مه‌جۆرن، ئه‌ندامانی گرووپه‌كه‌ به‌نگلادیشی، پاكستانی، ئێرانی، عێراقی، كورد، تورك، ئه‌لبانی و كه‌سانی رۆژهه‌ڵاتی ئه‌وروپاشی تێدایه‌".

ژماره‌یه‌ك تاوانباری دیكه‌ش كه‌ وێنه‌كانییان بڵاوكراوه‌ته‌وه‌، به‌ هه‌مان تۆمه‌ت دادگایی ده‌كرێن، به‌ڵام له‌ ده‌ره‌وه‌ی ئه‌و گرووپه‌ن، تا ئێستاش ناسنامه‌ی ته‌واوی ئه‌ندامانی ئه‌و گرووپه‌ ئاشكرا نه‌كراون.

سه‌رچاوه‌: هاف پۆست