كه‌ركووك.. ئه‌و شوقانه‌ى به‌سه‌ر واريسى شه‌هيدانى شه‌ڕى داعش دابه‌شكرابوون لێيان وه‌رده‌گيرێته‌وه‌

جبوورى ئه‌و شوقانه‌ى دابه‌شكرابوون به‌سه‌ر واريسى پێشمه‌رگه‌ شه‌هيده‌كان لێيان وه‌رده‌گرێته‌وه‌

K24 – هه‌ولێر:

ده‌سه‌ڵاتدارانى كه‌ركووك به‌رده‌وامن له‌ ده‌ركردنى بڕيار و رێنمايى نوێ له‌ دژى كورد و له‌ نوێترين بڕياريشدا هه‌موو ئه‌و شوقانه‌ى له‌ گه‌ڕه‌كى په‌نجا عه‌لى و سه‌ياده‌ درابوونه‌ واريسى شه‌هيدانى پێشمه‌رگه‌ لێيان ده‌سێنرێته‌وه‌.

به‌ بڕيارى پارێزگارى كه‌ركووك به‌ وه‌كاله‌ت، راكان جبورى، شوقەکانی گه‌ڕه‌كى پەنجاعەلی و سەیادە کە بەشێکیان لەلایەن ئیدارەی پێشووى کەرکووک و به‌ بڕیاری  پارێزگارى شاره‌كه‌ نەجمەدین کەریم دابه‌شكرابوون به‌سه‌ر واريسى شه‌هيدانى شه‌ڕى داعش کە زۆربەیان کەسووکاری پێشمەرگەن، دەردەکرێن و لێیان وەردەگیرێتەوە.

ئه‌و بڕياره‌ى راكان جبوورى يه‌كێكه‌ له‌ ئه‌ڵقه‌ى زنجيره‌يه‌ك بڕيار و رێنمايى كه‌ له‌ دواى 16ى ئۆكتۆبه‌ر و خيانه‌ى فرۆشتنى كه‌ركووكه‌وه‌ له‌ لايه‌ن ژماره‌يه‌ك به‌رپرسى يه‌كێتى نيشتيمانى كوردستانه‌وه‌ له‌ دژى كورد له‌ شاره‌كه‌ ده‌رده‌كرێن.

له‌ ديارترين ئه‌و بڕيارانه‌، داگرتنى ئاڵاى كوردستان و سڕينه‌وه‌ى مۆركى كوردستانى بوونى كه‌ركووك و گۆڕينى به‌رپرسانى ئه‌منى و ئيدارى قه‌زا و ناحييه‌كان و فه‌رمانگه‌ ره‌سمييه‌كانى كه‌ركووكه‌ له‌ به‌رژه‌وه‌ندى عه‌ره‌ب و توركمانى شاره‌كه‌ و نه‌هێشتنى كورد له‌ پۆسته‌كاندا.