پارتی و یه‌كێتی كۆده‌بنه‌وه‌

گفتوگۆ له‌باره‌ی پشكی یه‌كێتی له‌ حكوومه‌ت ده‌كرێت

K24 - هه‌ولێر:

به‌ گوێره‌ی زانیاریی سه‌رچاوه‌یه‌ك له‌ مه‌كته‌بی سیاسیی پارتیی دیموكراتی كوردستان كه‌ به‌ كوردستان24ی راگه‌یاندووه‌، بڕیاره‌ ئەمڕۆ هه‌ردوو شاندی دانوستانكاری پارتی و یه‌كێتی‌، له‌باره‌ی پێكهێنانی كابینه‌ی نوێی حكوومه‌تی هه‌رێمی كوردستان له‌ پیرمام كۆببنه‌وه‌.

به‌ گوێره‌ی زانیارییه‌كان، شانده‌كه‌ی پارتی پێكدێت له‌ كه‌مال كه‌ركووكی،  كاكه‌مین نه‌جاڕ، هێمن هه‌ورامی، دڵشاد شه‌هاب، عه‌لی حوسێن، عه‌لی عه‌ونی و فرسه‌ت سۆفی.  شانده‌كه‌ی یه‌كێتیش بریتین له‌ عیماد ئه‌حمه‌د، ره‌فعه‌ت عه‌بدوڵڵا، بافڵ تاڵه‌بانی، شاڵاو كۆسره‌ت، عه‌دنان حه‌مه‌ی مینا، لاهور تاڵه‌بانی و له‌تیف شێخ عومه‌ر.

پێشتر لەتیف شێخ عومەر، گوتەبێژی یەکێتی بە کوردستان 24ی راگەیاندبوو، کۆبوونەوەکەی پارتی و یه‌كێتی دەبێتە درێژکراوەی کۆبوونەوەی رۆژی سێشەممەی رابردوو، کە لە سلێمانی کرا و بە گشتی باس لە پشکی یەکێتی لە کابینەی نوێی حکوومەتی هەرێمی کوردستان ده‌كرێت.

رۆژی چواری ئه‌م مانگه‌ له‌ هه‌ولێر پارتی و یه‌كێتی رێككه‌وتنێكی سیاسییان بۆ پێكهێنانی كابینه‌ی نوێی حكوومه‌تی هه‌رێمی كوردستان واژۆ كرد.