وەزیری تەندروستی پەیامێك بڵاودەكاتەوە
K24 - ھەولێر
سامان بەرزنجی، وەزیری تەندروستی ھەرێمی كوردستان بەبۆنەی جەژنی رەمەزان پەیامێكی بڵاوكردەوە و رایگەیاند "ئەو رێكارانەی دەگیرێتەبەر بۆ سەلامەتی و پاراستنی ئێوەی خۆشەویستە، ئومێدەوارین هەموو پێکەوە خۆپارێزی کەسی و ئامۆژگارییەکانی تەندروستی جێبەجێ بکەین".
دەقی پەیامی پەیامی پیرۆزبایی وەزیری تەندروستی حكوومەتی هەرێمی کوردستان:.
بەبۆنەی هاتنی جەژنی رەمەزانی پیرۆز، گەرمترین پیرۆزبایی جەژن لە سەرجەم موسڵمانانی كوردستان و عیراق و جیهان دەكەین، خوای گەورە رۆژو و تاعەتی هەموولایەك قەبوڵ بكات.
پیرۆزبایی جەژن لە خانەوادەی سەربەرزی شەهیدان و ئەنفالكراوان و پێشمەرگە قارەمانەكان و كەسوكاریان دەكەین، هیوای بەختەوەری و ژیانی ئاسودەیان بۆ دەخوازین.
هەروەك روونە جەژن هەڵگری پەیامی لێبووردەیی و ئاشتەوایی و خێروبەرەكەتە بۆ گشت مرۆڤایەتی و موسڵمانان، بەداخەوە ڕەمەزان و جەژنی ئەمساڵمان لە هەڵومەرجێكدا بەڕێدەكەین كە تەواوی جیهان بەدەست پەتای كۆرۆنای نوێ COVID -19 دەناڵێنێت و تاوەكو ئێستا چارەسەری بنبڕی بۆ نەدۆزراوەتەوە.
وەزارەتی تەندروستی لەژێر رۆشنایی هێڵە گشتییەکانی بەرنامەی کاری كابینەی نۆیەمی حكومەتی هەرێمی كوردستان بەردەوامە لە پێشكەشكردن و باشترکردنی خزمەتگوزاری تەندروستی، بەتایبەتی لە رۆژانی پشووی جەژنی رەمەزانی پیرۆز خزمەتگوزارییەکانی خۆپارێزی و چارەسەری هاوکات لەگەڵ هەڵمەتی بەرەنگاربوونەوەی ڤایرۆسی کۆڕۆنا لە هەرێمی کوردستان بەپێی پلانێکی تۆکمە پێشكەش بە هاووڵاتییان دەكات.
لێرەدا جارێكی تر وێڕای پیرۆزبایی جەژن، دەستخۆشی و رێز و سوپاسمان بۆ هەموو پزیشكان و كارمەندانی تەندروستی و فەرمانبەرانی دامودەزگاکانی تەندروستی دەردەبڕین كە ماندوونەناسانە و بە شەونخوونی خزمەتكردنیان بۆ هاووڵاتیان بەتایبەتی لە رووبەڕووبوونەوەی ئەم پەتایەی کۆرۆنا پێشکەش بە هاووڵاتییان کردووە.
هاوڵاتیانی خۆشەویست ...
سوپاستان دەكەین بۆ پابەندبوونتان بە رێنماییە تەندروستییەكان لە ماوەی رابردوو و لە ئێستادا، ئەو رێكارانەی دەگیرێتەبەر بۆ سەلامەتی و پاراستنی ئێوەی خۆشەویستە، ئومێدەوارین هەموو پێکەوە خۆپارێزی کەسی و ئامۆژگارییەکانی تەندروستی جێبەجێ بکەین، هیوادارین ئەو ئاستەنگیانەی هاتوونەتە پێش بە زووترین كات تێیپەڕێنین و هەمووان ئاسودەی ژیانێکی تەندروست بن.
دووبارە جەژنی ڕەمەزان لە هەمووان پیرۆز بێت و هەر ساغ و سەلامەت بن.
د. سامان حسین بەرزنجی
وەزیری تەندروستی 24 ئایار 2020