عەدنان موفتی: دەبێ کورد لەسەر پرسە نەتەوەییەکان دانووستان بکات
K24 - سلێمانی
عەدنان موفتی، ئەندامی مەکتەبی سیاسی یەکێتی نیشتمانی کوردستان راگەیاند، دەبێت کورد لەگەڵ بەغدا لەسەر پرسە نەتەوەییەکان و مافە دەستوورییەکان و بودجەی هەرێمی کوردستان دانوستاندن بکات. ئاماژەی بەوەشدا، دەبێت کورد یەکڕیزی ناو ماڵی خۆی بپارێزێت و بە یەکدەنگی گفتوگۆ لەگەڵ بەغدا بکات.
عەدنان موفتی، بە كوردستان24 گوت: "ئەو كێشانەی دوای ھەڵبژاردن لە عێراق دروستبوون، كە ھەندێك لایەن تانەیان لەد ئەنجامەكان داوە و پەرلەمانی عێراقیش پڕۆژە بڕیارێكی بۆ رەتكردنەوەی ئەنجامەكان پەسند كردووە و ئاراستەی كۆمسیۆنی كردووە، لە ھەمانكاتدا تانە لە بڕیارەكەی پەرلەمانی عێراق دراوە، پێویستە گفتوگۆ دەست پێبكات، بۆ ئەوەی پرۆسەی سیاسی عێراق تووشی كێشە زیاتر نەبێت و كێشەكانی گەلانی عێراق چارەبكرێن، ناكۆكییەكانی ھەرێمی كوردستان و بەغدا لەپێش ھەموویانەوە".
گوتیشی: "ئەگەر كورد گفتوگۆ لەگەڵ بەغدا بكات، دەبێ داواكارییەكان تایبەت بن بە پرسە نەتەوەیی و مافە دەستوورییەكان، وەك كەركووك و پێشمەرگە، بودجەی ھەرێمی كوردستان".
عەدنان موفتی ئاماژەی بەوەشكرد: "بڕیاری پوچەڵككردنەوەی دەنگی پێشمەرگە لە ھەڵبژاردنی پەرلەمانی عێراق بڕیارێكی سەرسوڕھێنەرە، لەبەرامبەر ھەموو ئەمانە دەبێ كورد یەكڕیزی خۆی بپارێزێ و بە یەكدەنگی گفتوگۆ بكات".
ھ.م