له‌ به‌رزاییه‌وه‌ ده‌یانخه‌نه‌ خواره‌وه‌و به‌ گوللـه‌ ده‌یانكوژن

ڤیدیۆی كوشتنی چه‌ند كه‌سێك له‌ مووسڵ تۆڕه‌ كۆمه‌ڵایه‌تییه‌كان ده‌هه‌ژێنێت
kurdistan24.net

K24 - هه‌ولێر:

به‌ گوێره‌ی ڤیدیۆیه‌ك، كه‌ له‌ لایه‌ن چالاكوانانی تۆڕه‌ كۆمه‌ڵایه‌تییه‌كانه‌وه‌ بڵاوكراوه‌ته‌وه‌، ژماره‌یه‌ك كه‌س به‌ جلوبه‌رگی سه‌ربازییه‌وه‌ له‌ شاری مووسڵ، ئه‌شكه‌نجه‌ی چه‌ند كه‌سێك ده‌ده‌ن و به‌ گوێره‌ی قسه‌ی ئه‌و سه‌ربازانه‌ بێت، ئه‌وانه‌ چه‌كداری داعشن، به‌ڵام هه‌ندێكیش وه‌ك هاووڵاتی سڤیل ناویان ده‌به‌ن كه‌ له‌لایه‌ن ئه‌و هێزانه‌وه‌ ئه‌شكه‌نجه‌ دراون و كوژراون.

ڤیدیۆكه‌ كرده‌وه‌ی زۆر توندوتیژیی تێدایه‌ و پاش ئه‌وه‌ی سه‌ربازه‌كان له‌و له‌و كه‌سانه‌ ده‌ده‌ن، پاشان له‌سه‌ر به‌رزاییه‌كه‌وه‌ فڕێیان ده‌ده‌نه‌ خواره‌وه‌ و ته‌قه‌یان لێده‌كه‌ن و ده‌یانكوژن.

هه‌ندێك سه‌رچاوه‌ی عێراقی ئاماژه‌یان بۆ ئه‌وه‌كردووه‌، كه‌ ئه‌و هێزه‌ی به‌و كاره‌ هه‌ستاون سه‌ر به‌ حه‌شدی شه‌عبین، كه‌ له‌ لایه‌ن ئێرانه‌وه‌ پاڵپشتی ده‌كرێن و پێشتریش له‌ لایه‌ن رێكخراوه‌ نێوده‌وڵه‌تییه‌كانه‌وه‌ به‌ پێشێلكاریی و ئه‌نجامدانی تاوانی جه‌نگ، تاوانبار كراون و هۆكاری مه‌زهه‌بی له‌ پشت ئه‌و ره‌فتارانه‌یانه‌وه‌ هه‌یه‌.

له‌و باره‌یه‌وه‌ سه‌عد معه‌ن، گوته‌بێژ به‌ ناوی وه‌زاره‌تی ناوخۆ و ئۆپراسیۆنی به‌غداوه‌ گوتوویه‌تی "ڤیدیۆی فڕێدانه‌ خواره‌وه‌و كوشتنی هاووڵاتیان ره‌تده‌كه‌ینه‌وه‌و ده‌ستمان به‌ لێكۆڵینه‌وه‌ له‌و رووداوه‌ كردووه‌".