پەكەكە: قەندیل چۆڵ ناكەین
K24 - ھەولێر
موراد قەرەیلان، ئەندامی دەستەی بەڕێوەبردنی پارتی كرێكارانی كوردستان (پەکەکە) رایدەگەیەنێت، پەكەكە قەندیل چۆڵناكات و ئەنجامدانی ئۆپەراسیۆنی تورکیا بۆ سەر قەندیل و شنگال ئاسان نابێت.
قەرەیلان، لە لێدوانێکیدا بۆ ئاژانسی فوراتی نزیك لە پەکەکە رایگەیاند: "تورکیا بەردەوام هەڕەشەی ئەنجامدانی ئۆپەراسیۆن بۆ سەر قەندیل دەکات، بەڵام دەبێت تورکیا بزانێت کە هێرشکردنە سەر قەندیل و شنگال ئاسان نابێت. هەڕەشەکانی حکوومەتی تورکیا پڕوپاگەندەی هەڵبژاردنە".
موراد قەرەیلان، گوتیشی: "ئەردۆغان بە هەڕەشەی هێرشکردنە سەر قەندیل درۆی گەورە دەکات و ئەگەر دەتوانێت هێرش بکات با بفەرموێت، ئەگەر ئەردۆغان شەڕەفی هەبێت هێرش دەکاتە سەر قەندیل".
لەبارەی هەواڵی چۆڵکردنی قەندیلیش، موراد قەرەیلان رایگەیاند: "قەندیل چۆڵنەکراوە و چۆڵیشی ناکەین. هێرشکردنە سەر قەندیل بۆ تورکیا ئاسان نابێت".
ئەو گوتانەی قەرەیلان، لەكاتێكدایە كە سوپای توركیا ئۆپەراسیۆنی زەمینی و ئاسمانی لە ناوچە سنوورییەكانی باكوور- باشووری كوردستان، بۆ سەر پەكەكە دەستپێكردووە و بەشێك لەو ناوچانەی كە پێشتر بنكە و بارەگاكانی پەكەكەی لێبوو، ئێستا كەوتووە دەست سوپای توركیا.
ھ.م