سووریا ديمه‌شق: ئه‌ردۆغان سه‌ره‌ڕۆيه‌ و كار بۆ لێدانى سه‌قامگيرى سووريا و عێراق ده‌كات

ديمه‌شق: ئه‌ردۆغان سه‌ره‌ڕۆيه‌ و كار بۆ لێدانى سه‌قامگيرى سووريا و عێراق ده‌كات

K24 – هه‌ولێر:

وه‌زاره‌تى ده‌ره‌وه‌ى سووريا به‌ توندى وه‌ڵامى سه‌رۆكى توركيا ره‌جه‌ب ته‌يب ئه‌ردۆغانى دايه‌وه‌.

دوێنێ ئه‌ردۆغان رايگه‌ياند، ئامانجى له‌شكركێشى سوپاى توركيا بۆ سه‌ر خاكى سووريا له‌ناوبردنى ده‌سه‌ڵاتى ئه‌سه‌د و نه‌مانى به‌شار ئه‌سه‌ده‌ له‌ سه‌ر ده‌سه‌ڵات.

له‌ وه‌ڵامى ئه‌و لێدوانه‌دا، وه‌زاره‌تى ده‌ره‌وه‌ى سووريا رايگه‌ياند، ئه‌و قسانه‌ى ئه‌ردۆغان سنوورێكى بۆ درۆ و چه‌واشه‌كارييه‌كانى توركيا له‌ باره‌ى له‌شكركێشى بۆ سه‌ر سووريا دانا.

ئاژانسى هه‌واڵده‌رى ساناى ره‌سمى سووريا بڵاويكرده‌وه‌،  وه‌زاره‌تى ده‌ره‌وه‌ى سووريا رايگه‌ياند، ئه‌و لێدوانه‌ى ئه‌ردۆغان به‌ روونى دوژمنكارى و ده‌ستدرێژى ئاشكراى توركياى بۆ سه‌ر زه‌وى سووريا ئاشكرا كرد.

هه‌روه‌ها گوتى: ئه‌و دوژمنكارييه‌ى توركيا ئه‌نجامى چاوچنۆكى و وه‌همه‌كانى سه‌ره‌ڕۆيه‌كى ئيخوانى توندڕه‌وى وه‌ك ئه‌ردۆغانه‌ كه‌ توركياى كردووه‌ته‌ بنكه‌ى سه‌ره‌كى گرووپه‌ تيرۆريسته‌كان و كار بۆ لێدانى سه‌قامگيرى و ئاسايشى سووريا و عێراق ده‌كات.

هه‌روه‌ها وه‌زاره‌تى ده‌ره‌وه‌ى سووريا له‌ به‌ياننامه‌كه‌يدا ئه‌وه‌شى وتوه‌: توركيا يه‌كه‌م به‌رپرسيارێتى خوێن و ئازارى هه‌موو ئه‌و بێتاوانانه‌ى ده‌كه‌وێته‌ ئه‌ستۆ كه‌ به‌ هۆى تاوانه‌ تيرۆريستييه‌كانه‌وه‌ كه‌وتوونه‌ته‌وه‌ و هه‌موو ئه‌و تاوانانه‌ش به‌ پشتيوانى رژێمى توركيا ئه‌نجامدراوون. وه‌ك ئه‌وه‌ى له‌ به‌ياننامه‌كه‌ى وه‌زاره‌تى ده‌ره‌وه‌ى سووريادا هاتووه‌.