نه‌تانیاهو مه‌ترسییه‌كانی سه‌ر داهاتووی رووسیا ئاشكرا ده‌كات

سه‌رۆك وه‌زیرانی ئیسرائیل: ئێران هه‌وڵی داگیركردنی رۆژهه‌ڵاتی ناوه‌ڕاست ده‌دات

K24 - هه‌ولێر:

بنیامین نه‌تانیاهو، سه‌رۆك وه‌زیرانی ئیسرائیل، له‌ دیدارێكی كه‌ناڵی RBC رووسی، له‌باره‌ی مه‌ترسییه‌كانی تاران بۆ سه‌ر مۆسكۆ هۆشداریی ده‌دات.

سه‌رۆك وه‌زیرانی ئیسرائیل به‌ كه‌ناڵه‌ رووسییه‌كه‌ی گوتووه‌: "هه‌ڵوێسته‌كانی تاران و مۆسكۆ هه‌میشه‌ وه‌ك یه‌ك و هاوته‌ریب نیین، جگه‌ له‌وه‌ش، هاوشانی ئیسلامییه‌ سوننه‌مه‌زهه‌به‌ توندڕه‌وه‌كان، ئێران یه‌كێك له‌و لایه‌نانه‌یه‌ ده‌بێته‌ مه‌ترسی بۆ سه‌ر ئایینده‌ی رووسیا".

نه‌تانیاهو گوتوویه‌تی: "مه‌ترسی گه‌وره‌ ئیسلامی شیعیی توندڕه‌وه‌ كه‌ حوكمی ئێران ده‌كه‌ن، ئه‌وانه‌ هه‌وڵی ده‌ستخستنی چه‌كی ئه‌تۆمی و داگیركردنی رۆژهه‌ڵاتی ناوه‌ڕاست ده‌ده‌ن".

هه‌روه‌ها گوتوویه‌تی: "له‌ كۆتاییدا ئێران چه‌ك و ئایدۆلۆژیاكه‌ی جگه‌ له‌ رۆژئاوا و ئیسرائیل، ره‌وانه‌ی رووسیاش ده‌كات".