سەرۆکەکانی لاوانی سیاسی ئەوروپا له‌ پێشێلكارییه‌كانی حه‌شدی شه‌عبی ئاگادار ده‌كرێنه‌وه‌

له‌ ئیتالیا ریفراندۆم و كێشه‌ی کەرکوک و پێشێكارییه‌كانی حه‌شد خرایه‌ڕوو

K24 - هه‌ولێر:

لە ئیتاڵیا باسی ریفراندۆم و كێشه‌ی کەرکوک و ئه‌و پێشێكاریانه‌ بۆ سەرجەم سەرۆکەکانی لاوانی سیاسی وڵاتانی ئەوروپا کرا، كه‌ له‌لایه‌ن هێزه‌كانی حه‌شد وسوپای عێراق له‌ رۆژی 16ـی ئۆكتۆبه‌ر و رۆژانی دواتر دژی كورد ئه‌نجامیانداوه.

فه‌لاح حه‌سه‌ن كه‌ لاوێكی كورده‌ و جێگری سەرۆکی لاوانی سیاسی جیھانییه‌، لە شاری میلانۆی ئیتالیا بۆ سەرپەرشتی کردنی بەشێکی کۆبوونەوەکە وەکو جێگری سەرۆکی لاوانی سیاسی جیھان بەشداریکردو لە تەوەرێکدا باسی کوردستان و دواین گۆرانکاریەکانی کرد.

فەلاح حەسەن، جێگری سەرۆکی لاوانی سیاسی جیھانی، ئاماژه‌ی بە سەرکەوتنی مەزنی گەلی کوردستانی کرد لە ریفراندۆمی سەربەخۆیی کوردستاندا و باسی لە ھێرش و وێرانکاری و کوشتارەکانی کەرکوک و خورماتووی کرد، كه‌ لەلایەن میلیشیا عیراقیەکان و دۆستە ژێربەژێرەکانیان دژی كوردی ناوچه‌كه‌ ئه‌نجامیانداوه‌.

 

فەلاح حەسەن، جێگری سەرۆکی لاوانی سیاسی جیھانی له‌ كۆبوونه‌وه‌ی لاوانی سیاسی وڵاتانی ئه‌وروپا له‌ ئیتالیا
فەلاح حەسەن، جێگری سەرۆکی لاوانی سیاسی جیھانی له‌ كۆبوونه‌وه‌ی لاوانی سیاسی وڵاتانی ئه‌وروپا له‌ ئیتالیا

جێگری سەرۆکی لاوانی سیاسی جیھانی، داوای لە ئامادەبووان و سەرۆکەکانی لاوانی سیاسی وڵاتانی ئەوروپی کرد کە لەئێستا و لە ئایندەدا پشتگیری لە گەلی کورد بکەن و ھاوکارمان بن لە بنیاتنانی لۆبیەکی تەندروست بۆ کوردستان.

رۆژی 16ـی ئۆكتۆبه‌ری سالی 2017 هێزه‌كانی حه‌شدی شه‌عبی و سوپای عێراق، به‌هۆی ریككه‌وتنێكی ژێر به‌ ژێر له‌گه‌ڵ ژماره‌یه‌ك سه‌ركرده‌ی یه‌كێتی (وه‌ك ئه‌وه‌ی له‌ به‌یاننامه‌كانی رۆژی پاشتری جێگری یه‌كه‌می سكرتێری گشتی و لێپرسراوی ده‌سته‌ی كارگێڕی مه‌كته‌بی سیاسی یه‌كێتی ئاماژه‌ی پێكرا) كه‌ركووك و خورماتوو و ناوچه‌كانی ده‌وره‌به‌ریان راده‌ستی حه‌شدی شه‌عبی كران.

هێزه‌كانی حه‌شدی شه‌عبیش جگه‌ له‌ سووتاندن و وێرانكاردنی ماڵ و دووكانی سه‌دان هاووڵاتی كورد، به‌تایبه‌تی له‌ خورماتوو، سه‌دان هه‌زار هاووڵاتی ناوچه‌كانیان ئاواره‌ كردو تا ئێستاش ژماره‌یه‌كی زۆری ئاواره‌كان نه‌گه‌ڕاونه‌ته‌وه‌ ناوچه‌كانیان و به‌ چه‌ندین شێواز پێشێلكاری به‌رامبه‌ر به‌ كورد به‌رده‌وامه‌.