وێنه‌ی ئه‌نجامده‌ری هێرشه‌كه‌ی مانچیسته‌ر بڵاوكرایه‌وه‌

خه‌ڵكی لیبیایه‌ و باوكی ئه‌فسه‌رێكی پێشووی رژێمی قه‌زافی بووه‌و پاشان له‌ ده‌ست ئه‌و رژێمه‌ هه‌ڵهاتووه‌ بۆ بریتانیا

K24 - هه‌ولێر:

دوای تێپه‌ڕبوونی كه‌متر له‌ 24 كاتژمێر به‌سه‌ر هێرشه‌كه‌ی شاری مانچیسته‌ری رۆژئاوای بریتانیا، میدیاكانی بریتانیا وێنه‌یه‌كی "سه‌لمان عابدی" ئه‌نجامده‌ری هێرشه‌كه‌ی هۆڵی ئارینا بۆ ئاهه‌نگه‌كانیان بڵاوكرده‌وه‌ كه‌ به‌و هۆیه‌وه‌ 22 كه‌س كوژران و ده‌یان كه‌سی دیكه‌ برینداربوون.

رۆژنامه‌ی زه‌ سه‌نی بریتانی وێنه‌یه‌كی عابدی كه‌ كۆچه‌رێكی لیبییه‌ بڵاوكردووه‌ته‌وه‌ و نووسیوویانه‌ ئه‌و وێنه‌یه‌ به‌ ته‌نها ده‌ست رۆژنامه‌كه‌ی ئه‌وان كه‌وتووه‌.

وێنه‌ی سه‌لمان عابدی ئه‌نجامده‌ری هێرشه‌كه‌ی هۆڵی ئارینا له‌ شاری مانچیسته‌ری رۆژئاوای بریتانیا
وێنه‌ی سه‌لمان عابدی ئه‌نجامده‌ری هێرشه‌كه‌ی هۆڵی ئارینا له‌ شاری مانچیسته‌ری رۆژئاوای بریتانیا

به‌ گوێره‌ی زانیارییه‌كانی رۆژنامه‌یه‌كی دیكه‌ی بریتانی "ته‌له‌گراف" سه‌لمان عابدی ساڵی 1994 له‌ شاری مانچیسته‌ر له‌  دایكبووه‌ و دایك و باوكی لیبین و له‌ ده‌ست رژێمی پێشووی قه‌زافی رایانكردووه‌ته‌ بریتانیا.

دایكی ناوی "سامیه‌ ته‌باله‌ و ته‌مه‌نی 50 ساڵه‌ و باوكیشی ناوی "ره‌مه‌زان عابدی"یه‌ و ئه‌فسه‌ری ده‌زگای ئه‌منی لیبی بووه‌ پێشتر.

به‌ڵام باسی ئه‌وه‌ش ده‌كرێت كه‌ ئه‌و كوڕه‌یان له‌ لیبیا له‌  دایكبووه‌و پاشان كۆچیان كردووه‌ بۆ له‌ندن و پاش ماوه‌یه‌ك چوونه‌ته‌ ناوچه‌ی فالۆفێڵد له‌ باشووری شاری مانچیسته‌ر و ماوه‌ی 10 ساڵه‌ له‌و ناوچه‌یه‌دا ده‌ژین.

ئه‌یان هۆپكێنز، فه‌رمانده‌ی پۆلیسی مانچیسته‌ر رایگه‌یاندووه‌" ئه‌نجامده‌ری هێرشه‌كه‌ی هۆڵی ئارینا له‌و كاته‌ی ده‌یویست بۆمبێكی ده‌ستی بته‌قێنێته‌وه‌ كوژراوه‌ و پۆلیس سه‌رقاڵی لێكۆڵینه‌وه‌ن تا بزانن به‌ ته‌نها به‌و كاره‌ هه‌ستاوه‌ یان له‌ لایه‌ن تۆڕێكی دیكه‌وه‌ پاڵپشتی ده‌كرێت".

رۆژی سێ شه‌ممه‌ رێكخراوی داعش له‌ به‌یاننامه‌یه‌كدا به‌رپرسیارییه‌تی خۆیان له‌ ته‌قینه‌وه‌كه‌ راگه‌یاند و به‌ گوێره‌ی هه‌ژماره‌كانیان له‌ تۆڕه‌ كۆمه‌ڵایه‌تییه‌كان "سه‌ربازێكی خه‌لافه‌ت" به‌هۆی دانانه‌وه‌ی بۆمب هێرشه‌كه‌ی ئه‌نجامداوه‌.