ژماره‌یه‌ك ئەندامی ئەنجوومەنی گشتی هاوپەیمانی به‌رهه‌م ساڵح وازیان هێنا

له‌ ناو هاوپه‌یمانی بۆ دیموكراسی و دادپه‌روه‌ری "دیموكراسی و دادپه‌روه‌ری نه‌بووه‌" و خه‌ڵكیشی بێ ئومێد كرد

K24 - هه‌ولێر:

دوای ئه‌وه‌ی سه‌ركردایه‌تی یه‌كێتی له‌ راگه‌یه‌ندراوێكدا ئاشكرای كرد، هاوپه‌یمانی بۆ دیموكراسی و دادپه‌روه‌ری، كه‌ له‌لایه‌ن به‌رهه‌م ساڵح دامه‌زرا، بۆ یه‌كگرتنه‌وه‌ له‌گه‌ڵ ئه‌و حزبه‌ داوای گفتوگۆی كردووه‌، پێنج ئه‌ندامی ئه‌نجوومه‌نی گشتی هاوپه‌یمانێتییه‌كه‌ وازهێنانی خۆیان راگه‌یاند.

راگه‌یه‌ندراوه‌ هاوبه‌شه‌كه‌، له‌لایه‌ن هه‌ریه‌ك له‌ (رازاو مەحمود، ئەندامی خولی پێشووی پەرلەمانی كوردستان و ئەندامی ئەنجومەنی گشتی هاوپەیمانی - گەشە دارا، ئەندامی پەرلەمانی كوردستان - جەواد سەعید، پێشمەرگەی دێرین و راوێژكاری پەرلەمانی كوردستان و ئەندامی ئەنجومەنی گشتی هاوپەیمانی - رێزان عارف، ئەندامی ئەنجومەنی گشتی هاوپەیمانی - د. سەروەر عبدالرحمن عمر، ئەندامی خولی پێشووی پەرلەمان كوردستان).

ئه‌و پێنج ئه‌ندامه‌ی ئه‌نجوومه‌نی گشتی، له‌ ژێر ناوونیشانی "بۆ پشتگیری هاوپەیمانیمان كرد و بۆچیش وازمان لێی هێنا؟"، راگه‌یه‌ندراوێكی هاوبه‌شیان بڵاوكرده‌وه‌ و تێیدا باس له‌ هۆكاره‌كان ده‌كه‌ن.

به‌ گوێره‌ی راگه‌یه‌ندراوه‌ هاوبه‌شه‌كه‌، یه‌كێك له‌ هۆكاره‌كانی پشتگیریكردنی هاوپه‌یمانێتی، ئه‌وه‌ بووه‌ كه‌ "مۆدێلی حكومڕانی كوردستان خەڵكی توشی بێئومێدییەكی قول كرد، كە هەم حزبە بالادەستەكانیان بە هۆكار دەزانی و هەم لە سیاسەت و هەنگاوەكانی حزبە بەناو ئۆپۆزیسیۆنەكانیش نائومێد ببون".

هاوكات روونیشی ده‌كه‌نه‌وه‌، "هاوپه‌یمانی، حزبێك نه‌بووه‌ له‌ پڕێكدا قووتبووبێته‌وه‌ به‌ڵكو پرۆژه‌یه‌كی درێژخایه‌ن بووه‌".

ئاماژه‌ به‌ لێدوانێكی به‌رهه‌م ساڵح ده‌كه‌ن كه‌ هۆكاری هاتنه‌ده‌ره‌وه‌ی له‌ یه‌كێتی ئاشكرا كردووه‌ و گوتوویه‌تی: "هۆی هاتنەدەرەوەم، لەسەر چۆنیەتی ئیدارەدانی حزب و جیاوازی تێڕوانینمە لەسەر سیستەمی حوكمڕانی كوردستان، لەناو یەكێتی پۆستم هەبووە و پۆستی باڵاتریشیان پێدەدام، بەڵام ڕەتمكردۆتەوە، دەمانەوێت باری لاری حوكمڕانی كوردستان راست بكەینەوە، من چاوم لە پلەوپایە نەبووە، چونكە پلەو پۆست لە سیستەمێكی گەندەڵدا نرخێكی نیە، ئیتر بەسە چیتر ئەو ووڵاتە بە پشكپشكێنە و خزمخزمێنە و قۆرخكاری بەڕێوەناچێت، بەردەوام دەبین تا دەگەینە ئامانج".

له‌ به‌شێكی دیكه‌ی راگه‌یه‌ندراوه‌كه‌دا، ئاماژه‌یان به‌وه‌ش كردووه‌، لەگەڵ سەرەتای دروستبوونی قەوارەكەدا، "ئومێدمان كاڵ بووەوە و تێبینی زۆرمان لا دروستبوو، هەر لە نەبوونی شەفافیەت و دیموكراسی و دادپەروەرییەوە لەنێو قەوارەكەدا، تا باوەڕ نەبوون بە دامەزراوە و نەبوونی كاركردنی تیم و ئەنجامدانی كاری تاك ڕەوانەو كاركردنی بە میزاج، بردنە پێشەوەی كەسانێك كەتەنها بەرژەوەندی تایبەتی خۆیان رەچاو دەكرد، نەبوونی روئیایەكی روون بۆ داهاتووی كاری قەوارەكە، نەبوونی هەڵوێستی سیاسی لە كۆمەلێك رووداوی گرنگی كوردستان و عیراق و ناوچەكەو چەندانی تر".

ئه‌و پێنج ئه‌ندامه‌ ده‌شڵێن: "بۆ راستكردنەوەی هەڵوێست و هەنگاوەكان، ئێمە ئەو دەستە كادیرە كەبەشێوەیەكی نافەرمی دامەزرێنەری حەقیقی هاوپەیمانی بووین، لە نێو حزبەكانی خۆماندا دەستمان لەهەموو پلەو پۆست و ئیمتیازاتێك هەڵگرتبوو، بە گەرموگوڕی و نییەتپاكی هەوڵەكانمان بۆ سەرخستنی پڕۆژەكە خستەگەڕ، بەو ئومێدەی هەم سەرۆكی هاوپەیمانی جیاوازترە لە سەرۆكی حزبە تەقلیدیەكان و هەم هاوپەیمانیش مۆدیلێكی تەندروست و پێشكەوتووی حزبایەتی دادەهێنێت، بەڵام بەداخەوە نە سەرۆكی هاوپەیمانی جیاوازتر بوو لە سەرۆكە تەقلیدیەكان و نە هاوپەیمانیش مۆدیلی حزبەكانیتری تێپەڕاند، بەپێچەوانەوە هەوڵی تێكشكاندنی ئیرادەو توانای كەسایەتی هەموو ئەوانە دەدرا كە لەناو هاوپەیمانیدا رەخنەی جدیان هەبوو".

له‌ راگه‌یه‌ندراوه‌كه‌دا، ئه‌وه‌ش ئاشكرا ده‌كه‌ن، كه‌ گوێ له‌ ره‌خنه‌ و تێبینییه‌كانییان نه‌گیراوه‌ و سه‌رۆكی هاوپه‌یمانێتییه‌كه‌ "تادەهات هەیمەنەی خۆی زێتر دەكرد و خۆی لە كاری تیم و دامەزراوەیی و ڕاوێژكردن بەدوور دەگرت و بە پێشنیار و ڕەخنەكان قەڵس دەبوو، تەنها گوێی لەو كەسانە دەگرت كە بە هەموو قسەیەكی دەڵێن بەڵێ ڕاستە".

دووپاتیش له‌وه‌ ده‌كه‌نه‌وه‌، كه‌ گه‌یشتوونه‌ته‌ ئەو باوەڕەی سەرۆكی هاوپەیمانی "حزبەكەی تەنها بۆ بەرزكردنەوەی رەسیدی پێگەی سیاسی و ئابوری خۆی دروستكردوە بۆ ئەوەی لەگەڵ لایەنە سیاسییەكانی تردا مامەلەی پێوە بكات و لەو ڕێگایەشەوە دەستی بە پۆستێكی باڵا بگات". 

بڕیاری كشانه‌وه‌ی هاوپه‌یمانی له‌ هه‌ڵبژاردنی په‌رله‌مانی كوردستان، كه‌ بڕیاره‌ 30ی ئه‌یلوول ئه‌ه‌نجام بدرێت، ئه‌و پێنج ئه‌ندامه‌ی ئه‌نجوومه‌نی گشتی ده‌ڵێت: "سەرۆكی هاوپەیمانی لەپێناو گەیشتن بە ویستەكانی، بەرنامەی هاوپەیمانی و ئومێدی خەڵكی كوشت و (بە بیانووی ساختەكارییەوە) لەهەڵبژاردنی پەرلەمانی كوردستاندا كشایەوە، كە لە راستیدا بەلای ئەوەوە ئەمە تەنها بیانوو بوو، چونكە زۆر هەولی شاراوەو رێكەوتنی ژێربەژێر لەپشتیا خۆیان مەلاسدابوو، لەوەدەست هێنانی تموحێكی شەخسیدا چڕبوو بووەوە، هەموو ئەمانە هەم ئێمەو هەم خەلكیشی نائومێدكرد".

ئ. م