تورکیا هۆشداریی دەداتە هاووڵاتیانی لە عێراق
K24 – ههولێر:
حکوومەتی تورکیا هاووڵاتیانی لە سەردانیکردنی عێراق ئاگادار دەکاتەوە و داواشیان لێدەکات سەردانی شوێنە گشتیەکان نەکەن.
وەزارەتی دەرەوەی تورکیا لە راگەیاندراوێکدا ئاماژەی بەوەکردووە، دوای کوژرانی قاسم سولەیمانی، فەرماندەی پێشووی سوپای قودس، باردۆخی عێراق خراپ بووە و ئەگەری ئاڵۆزتربوونی زیاتری لێدەکرێت.
وەزارەتی دەرەوەی تورکیا داواشی لە هاووڵاتیانی کردووە ئەگەر پێویست نەبێت سەردانی عێراق نەکەن و هاوکات خۆشیان لە سەردانیکردنی شوێنە جەنجاڵەکان بپارێزن.
جیا لە تورکیا، پێشتر وڵاتانی ئەمەریکا، هۆڵەندا، ئوستراڵیا و کەندا هۆشدارییان داوەتە هاووڵاتی و دیبلۆماتەکانیان لە عێراق.
کوژرانی قاسم سولەیمانی و ئەبو مەهدی موهەندیس، ناسەقامگیریی عێراقی زیاتر کردووە و هاووڵاتیان ترسیان لە کاردانەوەی زیاتری نێوان ئەمەریکا و ئێران هەیە.
H.J