گەرمیان یادی تاوانی ئەنفال دەكاتەوە

K24 - گەرمیان

ئەمڕۆ 31 ساڵ بەسەر تاوانی ئەنفال لە دەڤەری گەرمیان تێدەپەڕێت، خەڵكی ناوچەكەش بە ھاوكاری وەزارەتی شەھیدان و ئەنفالكراوان، بە چەندین چالاكی یادی شەھیدبوونی كەسوكاریان دەكەنەوە.

ھەرێم جاف، پەیامنێری كوردستان24 لە گەرمیان رایگەیاند: "لە مۆنۆمێنتی دێبنە لە ناحیەی رزگاری رێوڕەسمێك بۆ یادی 31 ساڵەی ئەنفال رێكخراوە، ژماریەكی بەرچاو لە خەڵكی گەرمیان و بەرپرسانی حكوومی و نوێنەری لایەنە سیاسییەكان ئامادەی رێوڕەسمەكەن".

بێستون ژاڵی، وتەبێژی رێوڕەسمی یادی 31 ساڵەی ئەنفالكردنی گەرمیان بە كوردستان24 گوت: "یادی 31 ساڵەی ئەنفال لە سەرەتادا بە چەند چالاكییەكی ھونەری دەست پێدەكات و دواتر چەند چالاكی دیكە ئەنجامدەدرێن".

گوتیشی: "جگە لە بەرپرسانی حكوومەتی ھەرێمی كوردستان و پەرلەمانی عێراق، شاندێكی كونسوڵ و نوێنەری وڵاتانی بیانی بەشداری لە ساڵیادی ئەنفال دەكەن".

ئه‌نفال، یان پرۆسه‌ی جینۆساید و قڕكردنی كورد، یه‌كێك له‌ پرۆسه‌كانی رژێمی به‌عسی رووخاو (1963 - 2003) بوو، كه‌ به‌ هه‌شت قۆناغ دژی كورد جێبه‌جێیكرد.

یه‌كه‌م قۆناغی له‌ (22ی شوبات/ فێبرایه‌ر و تا 18ی ئازار/ مارسی 1988)ی خایاند. له‌و قۆناغه‌دا دۆڵی جافایه‌تی ئه‌نفالكرا.

قۆناغی دووه‌م له‌ (22ی ئازار/ مارس – 1ی نیسان/ ئه‌پریڵی 1988) به‌ڕێوه‌چوو، ناوچه‌كانی قه‌ره‌داغ ئه‌نفالكران.

قۆناغی سێیه‌م (7ی نیسان/ ئه‌پریڵ – 20ی نیسان/ ئه‌پریڵی 1988) له‌ ناوچه‌ی گه‌رمیان ئه‌نجامدرا.

قۆناغی چواره‌م له‌ (3ی ئایار/ مایۆ تا 15ی ئایار/ مایۆی 1988) بۆ سه‌ر ناوچه‌ی قه‌ڵاسێوكه ‌و دۆڵی زێی بچووك، ئه‌نجامدرا.

قۆناغه‌كانی پێنج و شه‌ش و حه‌وت، له‌ (15ی ئایار/ مایۆ تا 26ی ئاب/ ئۆگستی 1988) به‌ڕێوه‌چوون و تێیدا ناوچه‌كانی شه‌قڵاوه ‌و ره‌واندز به‌ر شاڵاوه‌كه‌ كه‌وتن.

قۆناغی هه‌شته‌م و كۆتایی له‌ (26ی ئاب/ ئۆگست تا 6ی ئه‌یلوول/ سێپتێمبه‌ری 1988) ئه‌نجامدرا و تێیدا هێرشكرایه‌ سه‌ر ناوچه‌ی بادینان.

لە كۆی قۆناغەكانی ئەنفال، رژێمی بەعسی لەناوچووی عێراق 182 ھەزار كەسی لە شار و گوندەكانی كوردستان ئەنفال كرد.

ھ.م