ئێران و عێراق و توركیا له‌سه‌ر ریفراندۆم داوایه‌ك له‌ كۆمه‌ڵگای نێوده‌وڵه‌تی ده‌كه‌ن

له‌ نیویۆرك كۆبوونه‌ته‌وه‌

K24 - هه‌ولێر:

وه‌ز‌یرانی ده‌ره‌وه‌ی وڵاتانی عێراق و توركیا و ئیران، دوای ئه‌نجامدانی كۆبوونه‌وه‌یه‌كی سێ قۆڵی له‌ نیویۆرك، كه‌ یه‌كێك له‌ ته‌وه‌ره‌ سه‌ره‌كییه‌كانیان باسكردنی ریفراندۆمی سه‌ربه‌خۆیی كوردستان بووه‌، له‌ كۆتاییدا به‌یاننامه‌یه‌كی هاوبه‌شیان بڵاوكردووه‌ته‌وه‌‌.

به‌ گوێره‌ی به‌یاننامه‌كه‌، هه‌ر سێ لایه‌ن ریفراندۆمیان ره‌تكردووه‌ته‌وه‌و ته‌ئكیدیان له‌سه‌ر پاراستنی عێراق و توركیا و ئێران كردووه‌ته‌وه‌.

له‌ به‌یاننامه‌كه‌دا هاتووه‌ "هه‌ر سێ وڵات له‌سه‌ر ئه‌و پره‌نسیپانه‌ كۆكن و جارێكی دیكه‌ ته‌ئكیدیان له‌سه‌ر یه‌كپارچه‌یی عێراق كردووه‌ته‌وه‌و ده‌رباره‌ی پرۆژه‌ی سه‌ربه‌خۆیی كوردستان كه‌ بڕیاره‌ رۆژی 25/9/2017 به‌ڕێوه‌ بچێت، مه‌ترسی خۆیان ده‌ربریوه‌ كه‌ هه‌موو ده‌ستكه‌وت و سه‌ركه‌وتنه‌كانی عێراق له‌ بواری شه‌ڕی تیرۆر بخاته‌ مه‌ترسییه‌وه‌و كێشه‌ی دیكه‌ له‌ ناوچه‌كه‌ درووست بكات".

وه‌زیرانی هه‌ر سێ وڵاته‌كه‌ ده‌ڵێن: "پێویسته‌ له‌ چوارچێوه‌ی ده‌ستووردا كێشه‌كانی "نێوان هه‌ولێر و به‌غدا چاره‌سه‌ر بكرێت و ته‌ئكیدیان له‌ هه‌وڵه‌ نێوده‌وڵه‌تییه‌كان كردووه‌ته‌وه‌ بۆ ئه‌وه‌ی هه‌رێمی كوردستان ریفراندۆم نه‌كات و به‌ نێوه‌ندگیرییه‌ نێوده‌وڵه‌تییه‌كان رازی ببێت بۆ ئه‌وه‌ی كێشه‌كان چاره‌سه‌ر بكرێت و جارێكی دیكه‌ش داوایان له‌ كۆمه‌ڵگای نێوده‌وڵه‌تی كردووه‌ به‌دواداچوون بۆ ئه‌و پرسه‌ بكات".

به‌ڵام له‌ به‌یاننامه‌كه‌یاندا هیچ هه‌ڕه‌شه‌یه‌كیان له‌ هه‌رێمی كوردستان نه‌كردووه‌و ته‌نها داواكاری و نیگه‌رانی وڵاته‌كانیان له‌سه‌ر ریفراندۆم خستووه‌ته‌ روو..