ديپلۆماتكارێكى ئه‌مريكا: پێويسته ده‌سته‌به‌رى دووباره نه‌بوونه‌وه‌ى تاوانه‌كانى كۆمه‌ڵكوژى بكرێت
K24 – هه‌ولێر:
ديپلۆماتكار و راوێژكارى ئه‌منى له ئيداره‌كانى هه‌ريه‌ك له سه‌رۆكانى پێشووترى ئه‌مريكا، كلينتۆن و باراك ئۆباما، ماك وۆڵد رايگه‌ياند، ئه‌م جۆره چالاكى و كۆنفرانسانه رۆڵێكى گرنگيان هه‌يه له ناساندنى ئه‌و تاوانانه‌ى له لايه‌ن به‌عسه‌وه ئه‌نجامدراوون.
له ميانى به‌شداريكردنى له كۆنفرانسى تايبه‌ت به كۆمه‌ڵكوژى و جينۆسايد و كيميايبارانى كوردستاندا، كه نوێنه‌رايه‌تى هه‌رێمى كوردستان له واشنتن سازيكرد، ئه‌و ديپلۆماتكاره‌ى ئه‌مريكا گوتيشى: "ئێمه له وه‌زاره‌تى ده‌ره‌وه، كارمان كردووه، بۆ ئه‌وه‌ى ئه‌نجامده‌رانى تاوانه‌كانى كۆمه‌ڵكوژى به سزا بگه‌يه‌ندرێن و رێگرى بكرێت له دووباره بوونه‌وه‌ى ئه‌و جۆره تاوانانه".
هه‌روه‌ها گوتى: "پێويسته له داهاتووشدا هه‌موو هه‌وڵێك بدرێت بۆ توندوتۆڵكردنى ئه‌و رێككارانه‌ى رێگرن له دووباره بوونه‌وه‌ى تاوانه‌كانى كۆمه‌ڵكوژى".
ماك وۆڵد، كه پێشتر باڵيۆزى دادوه‌رى بووه له وه‌زاره‌تى ده‌ره‌وه‌ى ئه‌مريكا و له‌گه‌ڵ نه‌ته‌وه‌يه‌كگرتووه‌كانيش له‌و بواره كاريكردووه، گوتيشى: "ئێمه بيرمان له‌وه كردووه‌ته‌وه چۆن بتوانرێت به سوودوه‌رگرتن له به‌ره‌نگاربوونه‌وه‌ى كۆمه‌ڵكوژى نازييه‌كان بڕيارێك گه‌ڵاڵه بكرێت بۆ رێگه‌گرتن له دووباره بوونه‌وه‌ى ئه‌و كۆمه‌ڵكوژيانه".
.jpg)
ئه‌مڕۆ به بۆنه‌ى سييه‌مين ساڵيادى كيميايبارانكردنى شارى هه‌ڵه‌بجه و شاڵاوه‌كانى جينۆسايدى كوردستان، به سپۆنسه‌رى ميديايى كوردستان24 له واشنتن كۆنفرانسێكى تايبه‌ت له باره‌ى جينۆسايدى كورد و هه‌ڵه‌بجه رێكخرا.
له‌و كۆنفرانسه‌دا، چه‌ندين به‌رپرس، توێژه‌ر، كۆنگرێسمان و نووسه‌رى ئه‌مريكى به‌شداربوون، له ئاستى وه‌زاره‌تى ده‌ره‌وه‌ى ئه‌مريكاشدا (ئه‌ندرو پيك)، جێگرى ياريده‌ده‌رى وه‌زيرى ده‌ره‌وه‌ى ئه‌مريكا بۆ كاروبارى عێراق و ئێران به‌شداريكرد.
كۆنفرانسه‌كه له هۆڵى (نيوزيه‌م) كه سه‌نته‌ر و مۆزه‌خانه‌يه‌كى گرنگى رۆژنامه‌وانييه له واشنتن به‌ڕێوه‌ده‌چێت و كوردستان24 راسته‌وخۆ رووماڵى ده‌كات.