کوردستانی عەرەبستان
شوێن : هەردوو پایتەختی سیاسی و رۆشنبیریی کودستانی باشوورە ...
کات : دەمە دەمی ریفراندۆم و سەربەخۆییە .
کارەکتەرەکان : خاوەن ماڵ بێگانەیە و ... ئاوارەش عەنتەر ...
دیمەنی یەکەم :
دەنگە دەنگێکی عەرەبیی ناساز تێکەڵ بە جریوە جریوی چۆلەکەی ئاسمانی کوردستان دەبێ :
ولەک عەبوود ... تەعال حەسوونی .... وێنەک ئەبوو جاسم ؟ ...
لەک وەلڵا ... ئیلێۆم ئەروح یەم سەعددەلڵا .... ئیحنە هنا بیششمال کوللیش مرتاحین !!
دیمەنی دووەم :
- کاکە بایی هەزار دینار سەموونی برژاوم دەوێ ...
- وەلڵا ما ئەفتهم کوردی ..
- دە سەموونی برژاوم دەوێ ..
- کاکە ئیحچی عەرەبی ... شنو سەموون برزاو ؟
- ئەی تۆ بۆ بەکوردی قسەناکەی ؟
- کاکە وەلڵا ئینتە لازم تتعەللەم عەرەبی !!
دیمەنی سێیەم :
- رۆژباش برا ...
- عەلەیکومەسسەلام ..
- کاکە خانوویەکی کرێمان دەوێ ..
- مەعەلئەسەف .....
- هەرهیچ نیە ؟
- هەیە بەڵام ...
- بەڵام چی ؟
- ببورە با ئەو تەلەفۆنە جواب بدەمەوە ... ئەلو .. ئەهلەن وەسەهلەن .. شلۆنەک ئەبو یاسر .. ئی ئی .. ئەکید .. لا تشیل هەم .. تفە‌ضەل یەمنە ...
- تێگەیشتم ... خوا حافیز ...
دیمەنی چوارەم :
لەوێ : پرسە گەرمە و شین و گرین و لاواندنەوەی دایک و خوشک و هاوژینی پێسمەرگە شەهیدەکە ئاسمانی تەڵخی تەنیوە ... زارۆکی کوردی رەش و رووت و ڕەجاڵ .. بێ سەرپەرشتیار ، لەناو گڵ ودارو بەردی گوندەکەیاندا مەشقی شەڕی تۆڵەسەندنەوەی باوک وبرای شەهیدیان دەکەن ..
لێرە: ئاهەنگ گەرمە ... هەلهەلە و قریوەی پێکەنینی دایک و خوشکی کاکی عرریس و دادەی عەروس ، ئاسمانی روونی تەنیوە ... سەما و خۆ بادان لەسەر ریتمی گۆرانییەکانی عادل عوگڵە و حوسام رەسسام تا نیوەشەو بەردەوامە ... وەلەکە عەرەبی سەرخڕ سەرخڕ لەناو هۆڵی ئاهەنگ و بەنێوان مێزی میوانەکاندا راکە راکیانە و بە پایسکیلەکانیان بەناو سەوزایی باخچەکاندا بێ پەروا فڕکان فڕکانیانە...
دیمەنی پێنجەم :
لەوێ : نزیکەی بیست تا بیست و پێنج گەنجی کوردن هەریەکەی لە شار و گوندێکەوە هاتوون، هەر لە خانەقینەوە تا زاخۆ، لەسەنگەرێکی هەرە پێشەوەی بەرەکانی شەڕی دژبە تیرۆردان
لێرە: نزیکەی بیست تا بیست و پێنج گەنجی عەرەبن هەریەکەی لە شار و گوندێکەوە هاتوون، هەر لە ئەنبارو تکریت و سامەڕڕاوە تا بەغداد و نەینەوا
لەوێ: شەڕ گەرمە ... گوللەتۆپ و راجیمە وەک رێژنەبارانێکی لەناکاو لە هەرچوارلاوە بەسەریاندا دەبارێ ..
لێرە: شیعە و سوننە ... ئا‌ثوری و کیلدان و ئەرمەن، کا‌ثۆلیک ئەرثۆذۆکس ... عثمان و عەلی ... عومەر و حسێن .. جۆرج و ئالیاس و عیسا .. موو بە بەینیاندا ناچێ
لەوێ: شەڕ تادێت گەرمتر دەبێ .. دوانیان دەپێکرێن ... دوانیتریان برینی هاوڕێکانیان دەپێچن ...
لێرە: .. بە دوو جۆر درێسەوە دابەشی دوو تیم بوون ... فوتبۆڵ وەک تیر لەمسەر بۆ ئەوسەری یاریگەکەی نزیکی ماڵمان دێت و دەچێت .. یاری تادیت گەرم و گەرمتر دەبێت بەداخەوە لەملا عودەی و لەولاش بەششار بەهۆی پێکانەوە لە گۆڕەپان برانە دەرەوە
لەوێ: هاتوهاوار و ئافەرین دەستت خۆشبێ .. بەرلە شەهید بوونی شیرزاد هاوار دەکات : یاکوردستان یان نەمان ! بژی کورد بژی کوردستان !
لێرە: هاتو هاوار و هاندان ... لەک عاشەت ئیدەک و گۆۆۆۆۆۆڵ ... عاش ئیلعێراق ئیلواحد ... ئەڵلاهوئەکبەر یا عێراق
لەوێ: پاشی کاتژمێرو نیوێک، بە خوێنی شەهیدێک و دوو بریندار.. بە ئازایەتی و خۆنەویستیی گەنجانی کوردپەروەر، سەرکەوتن تۆماردەکرێ و ئاڵای کوردستان لەجێی ئاڵا رەشەکەی تیرۆریستان دەشەکێتەوە !
لێرە : پاشی کاتژمێرو نیوێک بە هەوڵ و تێکۆشینی هەردوو تیمی ئاوارەی چاوڕەش ... یاریی بە سەرکەوتنی هەردوولا کۆتایی دێت و عەلەمی عێراق بەدەسیانەوە دەشەکێتەوە!