تۆپی پێ یارییه‌ چاره‌نووسازه‌كه‌ی عێراق له‌ دژی ئوسترالیا نزیك بۆته‌وه‌

یارییه‌ چاره‌نووسازه‌كه‌ی عێراق له‌ دژی ئوسترالیا نزیك بۆته‌وه‌
سه‌عد عه‌بدولئه‌میر ناوه‌ڕاستكاری هه‌ڵبژارده‌ی عێراق له‌ ته‌نیشت دوو یاریزانی ئوسترالیا ده‌یه‌وێت تۆپێك تێپه‌ڕ بكات

له‌ یارییه‌كانی پاڵاوتنی كیشوه‌ری ئاسیا بۆ گه‌یشتن به‌ مۆندیالی 2018 رووسیا، هه‌ڵبژارده‌ی عێراق و ئوسترالیا له‌ یارییه‌كی لوتكه‌ و چاره‌نووسسازدا به‌یه‌ك ده‌گه‌ن.

بڕیاره‌ رۆژی پێنجشه‌ممه‌ی داهاتوو له‌ كاتژمێر 3:00ـی ئێواره‌ به‌ كاتی باشووری كوردستان، هه‌ڵبژارده‌ی عێراق له‌ نێوخاكی ئێران رووبه‌ڕووی هه‌ڵبژارده‌ی ئوسترالیا ببێته‌وه‌.

عه‌لی عه‌دنان له‌ یانه‌ی ئۆدێنزی ئیتاڵیاوه‌ بۆ ریزه‌كانی هه‌ڵبژارده‌ی عێراق گه‌ڕاوه‌ته‌وه‌ و هه‌روه‌ها هه‌ر ‌دوو یاریزانی یانه‌ی ریزاسپۆری توركیا (عه‌لی فایز و زه‌رغام ئیسماعیل) ئاماده‌ی یارییه‌كه‌ ده‌بن.

هه‌ڵبژارده‌ی عێراق له‌ یاریی چوون به‌ دوو گۆڵێ بێوڵام یارییه‌كه‌ی به‌رامبه‌ر ئوسترالیا دۆڕاند، بڕیاریشه‌ له‌ 28 ئه‌م مانگه‌ رووبه‌ڕووی هه‌ڵبژارده‌ی سعوودیه‌ بێته‌وه‌.

هه‌ڵبژارده‌ی عێراق و ئوسترالیا كه‌وتوونه‌ته‌ كۆمه‌ڵه‌ی دووه‌م و شانبه‌شانی هه‌ڵبژارده‌كانی (سعوودیه‌، ژاپۆن، ئیمارات و تایلاند) یاری ده‌كه‌ن.

سعوودیه‌ و ژاپۆن به‌ كۆكردنه‌ویه‌ 10 خاڵ و به‌ هاوبه‌شی پله‌كانی یه‌كه‌م و دووه‌می كۆمه‌ڵه‌كه‌یان گرتووه‌، هه‌ڵبژارده‌كانی ئوسترالیا و ئیماراتیش به‌ 9 خاڵ پله‌كانی سێیه‌م و چواره‌میان گرتووه‌، هه‌ڵبژارده‌ی عێراقیش له‌ كۆی 5 یاری، ته‌نیا یه‌ك یاری بردۆته‌وه‌ و به‌ 3 خاڵ له‌ خانه‌ی پێشكۆتایی كۆمه‌ڵه‌كه‌ی دێت.