به‌ ڤیدیۆ.. سه‌ردار ئه‌زموون ئێرانی گه‌یانده‌ قۆناخی 16ـی جامی نه‌ته‌وه‌كانی ئاسیا

ئێران دووه‌مین سه‌ركه‌وتنی له‌سه‌ریه‌كی له‌ جامی نه‌ته‌وه‌كانی ئاسیا تۆمار كرد

له‌ كۆمه‌ڵه‌ی چواره‌می جامی نه‌ته‌وه‌كانی ئاسیای 2019، هه‌ڵبژارده‌ی ئێران دووه‌مین سه‌ركه‌وتنی له‌سه‌ریه‌كی تۆمار كرد و به‌ فه‌رمی بلیتی قۆناخی داهاتووی پاڵه‌وانێتییه‌كه‌ی بڕی.

ئێران له‌ دووه‌مین یاری خۆی رووبه‌ڕووی ڤێتنام بووه‌وه‌ و یارییه‌كه‌شی به‌ دوو گۆڵی بێوه‌ڵام برده‌وه‌، هه‌ردوو گۆڵه‌كه‌ش له‌ لایه‌ن سه‌ردار ئه‌زموونی هێرشبه‌ری لاوی یانه‌ی رۆبن كازانی رووسیا تۆمار كرا، به‌مه‌ش سه‌ردار ئه‌زموون تاكه‌ یاریزانه‌ له‌م پاڵه‌وانێتییه‌ 3 گۆڵ تۆمار بكات.

له‌ یارییه‌كی دیكه‌ی هه‌مان كۆمه‌ڵه‌دا پاش كه‌مێكی تر یه‌مه‌ن و عێراق به‌یه‌ك ده‌گه‌ن، هه‌ڵبژارده‌ی عێراق به‌ یه‌كسانبوون راسته‌وخۆ هاوشانی ئێران بۆ قۆناخی داهاتوو سه‌ر ده‌كه‌وێته‌ و یه‌مه‌ن و ڤێتنامیش به‌ فه‌رمی ماڵئاوایی له‌ پاڵه‌وانێتییه‌كه‌ ده‌كه‌ن.

هه‌ڵبژارده‌ی ئێران له‌ دوایین یاری قۆناخی كۆمه‌ڵه‌كانی رۆژی چوارشه‌ممه‌ی داهاتوو رووبه‌ڕووی عێراق ده‌بێته‌وه‌.